Ol tingting mo fasin blong mifala long taem blong berem dedman i stanap long ol tijing blong Baebol, olsem olgeta ya:

•   I nomol nomo blong krae taem wan we yu lavem hem i ded. Ol disaepol blong Jisas oli krae taem wan we oli lavem hem, i ded. (Jon 11:33-35, 38; Ol Wok 8:2; 9:39) Taswe, mifala i no ting se taem man i ded, hemia stret taem blong mekem wan bigfala lafet. (Prija 3:1, 4; 7:1-4) Be hemia stret taem blong soemaot sore.—Rom 12:15.

•   Dedman i no save wan samting. Nating se mifala i gruap long wanem ples mo kalja, mifala i no folem ol kastom mo fasin we oli stanap long giaman tijing ya, se ol dedman oli save samting mo oli save gat paoa long olgeta we oli laef. (Prija 9:5, 6, 10) Hemia ol kastom olsem, stap wekap long naet blong sidaon klosap long dedbodi, bigfala lafet blong berem dedman mo makem dei blong hem, ol sakrefaes long bihaf blong dedman, toktok mo askem help blong dedman, mo folem ol kastom blong jos we woman i mas mekem taem hem i lusum hasban blong hem. Mifala i no folem ol kastom mo fasin ya, from we mifala i obei long tok ya blong Baebol se: “Yufala i mas stap yufala nomo mo olgeta oli mas stap olgeta nomo, mo yufala i no mas tajem ol samting we oli no klin.”—2 Korin 6:17.

•   I gat hop blong ol dedman. Baebol i tijim se i gat hop blong ol dedman oli save laef bakegen, mo se i gat taem i stap kam we ded bambae i lus olgeta. (Ol Wok 24:15; Revelesen 21:4) Hop ya i givhan long mifala olsem we i givhan long ol fas Kristin, blong no harem nogud bitim mak.—1 Tesalonaeka 4:13.

•   Baebol i talem se yumi mas gat tingting daon. (Ol Proveb 11:2) Mifala i no bilif se taem blong berem dedman i wan taem blong “flas from ol samting” we mifala i gat mo “soemaot ” se mifala i gat mane. (1 Jon 2:16) Mifala i no mekem ol flas seremoni blong berem dedman, o pem wan flas bokis blong dedman, o werem ol narakaen klos blong mekem ol man oli sapraes.

•   Mifala i no traem blong fosem ol narafala blong folem bilif blong mifala long saed blong berem dedman. Mifala i lesin long advaes ya se: “Yumi wanwan i mas talemaot olgeta fasin blong yumi long God.” (Rom 14:12) Be sipos mifala i gat janis, mifala i traem blong eksplenem bilif blong mifala “long kwaet fasin mo bigfala respek.”—1 Pita 3:15.

 Ples: Sipos famle i mekem desisen blong gat wan sevis blong berem dedman, oli save jusum ples we oli wantem mekem, olsem Haos Kingdom, haos blong olgeta, o long beregraon.

 Sevis: Long sevis, i gat wan tok blong kamfotem ol man we oli krae. Tok ya i eksplenem samting we Baebol i talem long saed blong ded mo hop blong laef bakegen. (Jon 11:25; Rom 5:12; 2 Pita 3:13) Long sevis ya, maet oli tokbaot sam gudfala fasin blong man we i ded, mo ol lesen we yumi save lanem from gudfala eksampol blong hem.—2 Samuel 1:17-27.

 Maet mifala i singim wan singsing we i stanap long Baebol. (Kolosi 3:16) Mifala i endem sevis wetem wan prea we i leftemap tingting.—Filipae 4:6, 7.

 Mane mo kleksin: Mifala i no askem man blong pem ol sevis we mifala i mekem, olsem sevis blong berem dedman, mo mifala i no mekem kleksin long ol miting blong mifala.—Matiu 10:8.

 Olgeta we oli kam: Olgeta we oli no Witnes oli welkam blong joen wetem mifala long sevis blong berem dedman long Haos Kingdom. Olsem ol narafala miting blong mifala, eni man i save joen.

 Ol Witnes wanwan oli mas mekem desisen blong olgeta, we i stanap long tingting we oli trenem folem Baebol. (1 Timoti 1:19) Be mifala i no joen long ol seremoni blong jos we oli agensem Baebol.—2 Korin 6:14-17.