Yes, ol Witnes blong Jehova oli halpem ol man long taem blong disasta. Mifala i mekem plante samting blong givhan long ol Witnes mo ol narafala man tu. Hemia i stret long ol tok blong Baebol long Galesia 6:10, se: “Yumi mas mekem i gud long olgeta man. Antap moa, yumi mas mekem olsem long olgeta ya we oli brata mo sista blong yumi from we olgeta tu oli bilif long Kraes.” Mifala i traehad tu blong mekem man i harem gud long tingting blong hem, mo mifala i serem ol tok blong Baebol we ol man oli nidim long trabol taem olsem.—2 Korin 1:3, 4.

 Taem disasta i kasem wan ples, ol elda long ol kongregesen long eria ya oli traem toktok i go long evriwan long kongregesen blong olgeta, blong luk sipos oli sef mo blong faenemaot wanem we oli nidim. Afta, oli talemaot ol samting ya long branj ofis blong ol Witnes blong Jehova we i lukaot long kantri blong olgeta, mo oli talemaot samting we oli mekem finis blong givhan.

 Sipos oli nidim plante samting we ol kongregesen raonabaot long olgeta oli no naf blong givim, ale Hed Kampani blong ol Witnes blong Jehova i mekem plan blong givim ol samting ya. Hemia sem fasin we ol Kristin bifo oli folem taem kakae i sot long ples blong olgeta. (1 Korin 16:1-4) Branj ofis bambae i putumap komiti blong mekem plan mo blong lidim wok blong givhan long taem blong disasta. Plante Witnes long ol narafala ples tu oli givim taem mo paoa blong olgeta blong givhan.—Ol Proveb 17:17.

 Taem disasta i kasem wan ples, branj ofis i yusum presen mane we ol Witnes blong Jehova oli givim. (Ol Wok 11:27-30; 2 Korin 8:13-15) Olgeta we oli wok blong mekem gud ol haos bakegen, oli no kasem pei. Mo olgeta we oli lukaot long ol wok ya, olgeta tu oli no kasem pei. Olgeta mane i go blong givhan long olgeta we oli trabol. Mifala i yusum gud ol mane ya.—2 Korin 8:20.