Mifala ol Witnes blong Jehova, mifala i traehad blong folem ol tijing mo ol fasin we Jisas mo ol aposol blong hem oli mekem, we ol Kristin oli mas folem. Haf ya i tokbaot ol stamba bilif blong mifala.

1.   God. Mifala i wosipim trufala God nomo we i gat Olgeta Paoa, mo i Wokem olgeta samting long heven mo long wol, nem blong hem Jehova. (Ol Sam 83:18; Revelesen 4:​11) Hem i God blong Ebraham, Moses, mo Jisas.​—Eksodas 3:6; 32:11; Jon 20:17.

2.   Baebol. Mifala i luksave se Baebol i tok blong God we hem i givim long ol man, mo hem i yusum tabu spirit blong hem blong pulum ol man blong oli raetem. (Jon 17:17; 2 Timoti 3:​16) Mifala i bilif long evri tok long ol 66 buk blong Baebol, hemia i minim “Ol Testeman” mo “Niu Testeman” haf blong Baebol. Jason D. BeDuhn, wan tija blong yunivesiti i talem se, bilif blong ol Witnes blong Jehova i stanap “long save we i kamaot stret long Baebol mo oli no ting se Baebol i sud talem samting folem tingting blong olgeta.” a

    Mifala i agri fulwan long Baebol, be mifala i no akseptem eni tijing we i no stanap long Baebol. Mifala i luksave se i gat sam haf blong Baebol we oli tokbaot ol pijatok , be ol pijatok ya oli minim ol samting we oli defren.​—Revelesen 1:1.

3.   Jisas. Mifala i folem ol tijing mo eksampol blong Jisas Kraes, mo mifala i tinghae long hem olsem Sevia mo Pikinini blong God. (Matiu 20:28; Ol Wok 5:​31) Taswe, mifala i Kristin. (Ol Wok 11:26) Be, mifala i lanem long Baebol se Jisas i no God ya we i gat Olgeta Paoa mo i no gat wan vas blong Baebol we i tokbaot tijing ya blong Triniti.​—Jon 14:28.

4.   Kingdom blong God. Hemia wan trufala gavman we i stap long heven, be i no wan samting insaed long hat blong ol Kristin. Kingdom ya, bambae i tekem ples blong olgeta gavman long wol mo bambae i mekem stamba tingting blong God long wol ya i kamtru. (Daniel 2:​44; Matiu 6:​9, 10) I no longtaem, Kingdom ya bambae i tekem aksen, from we ol profet tok blong Baebol oli talem se yumi stap long ol “lasdei.”​—2 Timoti 3:​1-5; Matiu 24:​3-​14.

    Jisas nao i King long Kingdom blong God long heven. Hem i stat blong rul long yia 1914.​—Revelesen 11:15.

5.   God i sevem yumi. Ransom sakrefaes blong Jisas nao i mekem se God i sevem yumi aot long sin mo ded. (Matiu 20:28; Ol Wok 4:​12) Blong kasem blesing long sakrefaes ya, man i mas bilif long Jisas mo jenisim fasin blong laef blong hem mo i mas baptaes. (Matiu 28:19, 20; Jon 3:​16; Ol Wok 3:​19, 20) Wan man we i bilif, i soemaot long ol wok blong hem. (Jemes 2:​24, 26) Be, yumi no wok blong kasem mak ya se God bambae i sevem yumi, from we fasin ya we God i sevem yumi, i kamaot “long gladhat blong hem.”​—Galesia 2:​16, 21.

6.   Heven. Jehova God, Jisas Kraes mo ol enjel oli stap long ples blong olgeta long heven. b (Ol Sam 103:19-​21; Ol Wok 7:​55) Mo tu, i gat 144,000 man mo woman we bambae oli laef long heven blong rul wetem Jisas long Kingdom blong God.​—Daniel 7:​27; 2 Timoti 2:​12; Revelesen 5:​9, 10; 14:​1, 3.

7.   Wol. God i wokem wol ya blong ol man oli stap long hem, olsem ples blong olgeta blong olwe. (Ol Sam 104:5; 115:16; Prija 1:4) God bambae i blesem ol man we oli obei long hem, taem hem i mekem laef blong olgeta i kam stret gud mo oli laef long paradaes long wol ya, gogo i no save finis.​—Ol Sam 37:11, 34.

8.   Rabis fasin mo hadtaem. Ol samting ya oli stat taem wan long ol enjel blong God i agensem God. (Jon 8:​44) Afta we enjel ya i agensem God, oli singaot hem se “Setan” mo “Devel.” Hem nao i pulum Adam mo Iv blong tufala i no obei long God, taswe olgeta man we oli kamaot biaen long tufala, oli mekem rabis fasin mo oli kasem hadtaem. (Jenesis 3:​1-6; Rom 5:​12) God i letem ol rabis fasin oli hapen tede blong soemaot se Setan i man blong giaman, be God bambae i no letem ol samting ya blong oli stap olwe.

9.   Ded. Ol man we oli ded, oli no moa laef. (Ol Sam 146:4; Prija 9:​5, 10) Oli no go samples blong stap safa no harem nogud long wan faea.

    God bambae i mekem plante bilian man we oli ded, oli laef bakegen. (Ol Wok 24:15) Be, sipos olgeta we oli laef bakegen oli no wantem lanem ol samting we God i wantem, bambae oli ded mo neva bambae oli save laef bakegen.​—Revelesen 20:14,15.

10.   Famle. Mifala i folem tingting blong God long saed blong mared, se man i mas mared long wan woman nomo, mo tufala i save divos sipos wan long tufala i mekem rabis fasin blong seks wetem wan narafala. (Matiu 19:​4-9) Mifala i trastem ol advaes blong Baebol, se oli save givhan long ol famle.​—Efesas 5:22–​6:1.

11.   Wosip blong mifala. Mifala i no yusum kros long wosip blong mifala, no eni narafala pija. (Dutronome 4:​15-​19; 1 Jon 5:​21) Long wosip blong mifala, mifala i mekem ol samting ya:

    •   Prea long God.​—Filipae 4:6.

    •   Ridim Baebol mo stadi long hem.​—Ol Sam 1:​1-3.

    •   Tingting dip long wanem we mifala i lanem long Baebol.​—Ol Sam 77:12.

    •   Joen wanples blong prea, stadi Baebol, singsing, tokbaot bilif blong mifala, mo leftemap tingting blong narafala Witnes mo ol narafala.​—Kolosi 3:​16; Hibrus 10:23-​25.

    •   Talemaot gud nius blong Kingdom blong God.​—Matiu 24:14.

    •   Givhan long ol narafala we oli gat nid.​—Jemes 2:​14-​17.

    •   Bildim mo lukaot gud long ol Haos Kingdom mo ol narafala samting we oli givhan long wok blong tijim Baebol long fulwol.​—Ol Sam 127:1.

    •   Givhan long ol narafala long taem blong disasta.​—Ol Wok 11:27-​30.

12.   Ogenaesesen blong mifala. Mifala i joen long ol kongregesen, we wan grup blong ol elda i lukaot long olgeta wanwan. Be ol elda ya, oli no stap joen long wan spesel grup, mo oli no kasem pei from wok we oli mekem. (Matiu 10:8; 23:8) Mifala i no givim taet, mo mifala i no tekem kleksin long taem blong ol miting blong mifala. (2 Korin 9:7) Ol wok we mifala i mekem, i stanap long ol presen mane we mifala i kasem.

     Hed Kampani, hemia wan smol grup blong ol Kristin we oli bigman long Kristin fasin, mo oli wok long wol hedkwota blong ol Witnes blong Jehova. Olgeta oli lidim wok blong ol Witnes blong Jehova long fulwol.​—Matiu 24:45.

13.   Mifala i joengud. Long fulwol, mifala i joengud from bilif blong mifala. (1 Korin 1:​10) Mo mifala i traehad blong no seraot from kalja, kala blong skin, mo kantri. (Ol Wok 10:34, 35; Jemes 2:4) Nating se mifala i joengud, be mifala i save mekem prapa desisen blong mifala. Be desisen we mifala i mekem i mas laenap wetem save we mifala i lanem long Baebol.​—Rom 14:​1-4; Hibrus 5:​14.

14.   Ol fasin blong mifala. Mifala i traehad blong soemaot lav long olgeta fasin we mifala i mekem. (Jon 13:34, 35) Mifala i no wantem mekem wan fasin we bambae God i harem nogud from, olsem fasin ya blong givim blad mo tekem blad. (Ol Wok 15:28, 29; Galesia 5:​19-​21) Mifala i wantem gat pis wetem ol man mo mifala i no joen long ol faet. (Matiu 5:9; Aesea 2:4) Mifala i respektem gavman mo obei long ol loa blong hem, sipos ol loa ya oli no pulum mifala blong brekem ol loa blong God.​—Matiu 22:21; Ol Wok 5:​29.

15.   Fasin we mifala i soemaot long narafala. Jisas i talem se: “Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.” Mo tu, hem i talem se ol Kristin “oli no man blong wol ya.” (Matiu 22:39; Jon 17:16) Taswe, long ol samting we mifala i mekem, mifala i traehad blong “mekem i gud long olgeta man.” Nating se i olsem, mifala i no joen long politik mo ol narafala jos. (Galesia 6:​10; 2 Korin 6:​14) Be, mifala i respektem tingting blong ol narafala long desisen we olgeta oli mekem.​—Rom 14:12.

 Sipos yu wantem lanem moa long saed blong ol bilif blong ol Witnes blong Jehova, yu go long Websaet blong mifala mo luk sam moa save. Mo tu, yu save ring long wan ofis blong mifala, no yu save go long wan Haos Kingdom blong mifala klosap long ples blong yu, no yu save toktok wetem wan Witnes long eria blong yu.