Ol Witnes Blong Jehova oli bin yusum plante defren Baebol translesen taem oli stadi long Baebol. Be oli glad moa blong yusum Baebol Long Niu Wol Translesen sipos i gat long lanwis blong olgeta, from we hem i yusum nem blong God, mo translesen blong hem i stret mo i klia.

•   Yusum nem blong God. Sam man we oli wokem Baebol, oli no givim ona long Man ya we Baebol i kamaot long hem. Eksampol, wan Baebol i mekem lis blong bitim 70 nem blong ol man we oli givhan blong wokem Baebol ya. !Be yet, Baebol ya i no putum nem blong Jehova God we Baebol ya i kamaot long hem!

   Defren olgeta, Niu Wol Translesen i putumbak nem blong God long bitim wan taosen ples we hem i bin stap long hem long faswan Baebol, mo long semtaem, komiti we i wokem Baebol ya i no wantem se nem blong olgeta i kamaot long Baebol ya.

•   Tok we i stret. I no evri Baebol we oli transletem stret mesej we i stap long faswan Baebol. Eksampol, wan Baebol i transletem Matiu 7:13 se: “Yufala i mas pas long smol get, from we get we i go long hel, hem i bigwan, mo rod we i lidim man i go long ples ya i isi.” Be faswan Baebol i yusum tok ya “lus olgeta,” be i no “hel.” Maet ol transleta oli putum tok ya “hel” from we oli bilif se ol man nogud bambae oli safa blong olwe long helfaea. Be tingting ya i no kamaot long Baebol. Taswe, Niu Wol Translesen i yusum ol stret tok, i se: “Yufala i mas pas long smol get, from we get we i bigwan mo rod we i isi, i lidim man i go blong lus olgeta.”

•   Tok we i klia. Wan gudfala translesen i mas yusum ol tok we oli stret, be tu, hem i mas klia, mo i isi blong man i kasemsave. Tingbaot wan eksampol. Long Rom 12:11, Kristin aposol Pol i yusum wan tok we prapa mining blong hem se “blong spirit we i stap boel.” From we toktok ya i no gat mining long Bislama, Niu Wol Translesen i tanem vas ya long wan wei we i isi blong kasemsave. Hem i talem se ol Kristin oli sud “wok olsem we faea i laet.”

 Niu Wol Translesen i yusum nem blong God mo ol tok blong hem oli stret mo klia, be i no hemia nomo, hem i gat wan narafala samting tu: Man i no nid blong pem blong i kasem. Samting ya i mekem se plante milian man oli save ridim Baebol long lanwis blong olgeta. Olgeta we oli no naf blong pem wan Baebol, olgeta tu oli save kasem.