Mifala i no tanem baksaed long olgeta we oli baptaes olsem wan Witnes blong Jehova, be oli no moa mekem wok blong prij mo oli no moa kam mekem wosip wetem mifala. Be mifala i traehad blong givhan long olgeta blong oli fren gud bakegen wetem God.

 Mifala i no stap putumaot kwiktaem wan man we i mekem wan bigfala sin long kongregesen. Be sipos wan Witnes we i baptaes i gohed blong brekem ol loa blong Baebol mo hem i no tanem tingting blong hem, bambae kongregesen i putumaot hem. Baebol i talem se: “Man we i stap mekem sin oltaem, yufala i mas putumaot hem, blong hem i no moa save stap wetem yufala.”—1 Korin 5:13.

 ?Be olsem wanem long wan man we kongregesen i putumaot hem, be woman blong hem mo ol pikinini blong hem oli ol Witnes blong Jehova yet? Samting we i jenis, hemia se oli no moa joen long wan bilif. Be man ya i man blong woman ya yet mo i papa blong ol pikinini ya yet. Ol samting we oli mekem long famle i no jenis.

 Olgeta we kongregesen i putumaot olgeta, oli save kam long ol miting blong mifala. Sipos oli wantem, ol elda long kongregesen oli save givim advaes long olgeta. Mak blong ol elda i blong givhan long olgeta blong oli save kam ol Witnes blong Jehova bakegen. Sipos oli sakemaot ol nogud fasin blong olgeta, mo oli soemaot se oli laekem blong folem samting we Baebol i talem, olgeta oli save kambak bakegen long kongregesen.