Giaman: Ol Witnes blong Jehova oli no tekem meresin mo tritmen we dokta i givim.

 Tru: Taem mifala wanwan no famle blong mifala i sik, mifala i lukaot meresin mo tritmen we i beswan. Mifala i go luk ol dokta we oli agri se bambae oli no givim blad long mifala, be oli yusum ol narafala tritmen we oli gat save long olgeta. Mifala i glad tumas long ol niufala tritmen mo meresin we ol dokta oli faenemaot. Sam tritmen, fastaem oli wokem speseli blong givhan long ol Witnes, from we oli no tekem blad. Be naoia oli yusum tritmen ya long olgeta man. Long plante kantri, wan sikman i save jusum tritmen we hem i no tekem blad. Nao hem i no kasem ol sik we ol man oli save kasem taem oli tekem blad, wetem ol narafala trabol tu, olsem bodi i faet agensem blad ya, mo ol mastik blong givim rong blad.

 Giaman: Ol Witnes blong Jehova oli ting se bilif nao bambae i mekem sik i kam gud.

 Tru: Mifala i no ting se bilif bambae i mekem sik i kam gud.

 Giaman: Taem man i no tekem blad, praes blong tritmen blong hem i antap tumas.

 Tru: Taem man i no tekem blad, praes blong tritmen blong hem i daon moa. a

 Giaman: Evri yia, plante Witnes, wetem sam pikinini blong olgeta tu, oli ded from we oli no tekem blad. b

 Tru: I no gat pruf blong soemaot samting ya. Oltaem ol dokta oli katem ol Witnes from problem blong hat, mo blong jenisim wan joen no wan haf insaed long bodi blong olgeta. Be oli no givim blad long ol Witnes ya. Klosap oltaem, olgeta ya wetem ol pikinini blong olgeta tu we ol dokta oli katem, oli kam gud kwik moa i winim olgeta we oli tekem blad. c I no gat man we i save talem se sipos wan sikman i no tekem blad bambae hem i ded, no sipos hem i tekem blad bambae hem i laef.

 Hemia i no from we mifala i no wantem folem tritmen we dokta i talem, nogat. Be hemia from ol tok we Baebol i talem. Long tugeta haf blong Baebol, God i talem se yumi no mas tekem blad. (Jenesis 9:4; Levitikas 17:10; Dutronome 12:23; Ol Wok 15:28, 29) Mo tu, God i talem se laef blong olgeta samting i stap long blad blong olgeta. (Levitikas 17:14) Taswe, mifala i no tekem blad from we mifala i obei long tok blong God. Be i no hemia nomo. Mifala i no tekem blad tu from we mifala i respektem Jehova we i Stamba blong laef.

 Bifo, plante dokta oli ting se man we i no wantem tekem blad i wantem kilim hem wan i ded. Be naoia tingting ya i stap jenis. Long yia 2004, wan niuspepa blong ol dokta i talem se: “Ol dokta oli wokem plante tritmen blong ol Witnes blong Jehova nomo. Be, long ol yia we oli kam, bambae oli yusum ol tritmen ya long olgeta man.” d Long yia 2010, buk ya Heart, Lung and Circulation i talem se: “Ol dokta we oli katem ol Witnes [blong Jehova] be oli no givim blad long olgeta, oli mas mekem sem mak long ol narafala man tu.”

 Naoia, plante taosen dokta long ol defren ples long wol oli yusum ol rod blong sevem blad, taem oli katem man we i no wantem blad. Long plante pua kantri tu ol dokta oli mekem olsem. Plante man we oli no Witnes blong Jehova, be olgeta tu oli no wantem blad.

 Ol dokta oli save katem man from bigfala sik, we oli no givim blad long hem.