Long branj ofis blong ol Witnes blong Jehova long Yunaeted Stet, ol yangfala man mo woman oli givim taem mo paoa blong olgeta blong wasem samwe long 1,800 tan blong klos evri yia. Hemia long tri Betel ya, Brooklyn, Patterson, mo Wallkill, New York. Yumi sek long bigfala namba blong ol klos ya. Be samting we i mekem wok ya i spesel, hemia ol defdefren kaen klos we oli wasem.

Evri dei, olgeta we oli stap long trifala Betel ya, oli sanem bitim 11,000 defren klos long ples blong wasem klos: 2,300 sot, 650 traoses, wetem ol stokin, singlet mo andawea, mo ol ti sot. Mo tu, oli sanem 900 narafala samting blong drae klinim.

Antap long hemia, i gat fulap bedsit, tawel, blangket, yunifom blong olgeta we oli givimaot kakae, mo ol kaliko blong klinim ples. Oli mas wasem ol samting ya, draemap, mo tekem i gobak long ol rum. Ol samting olsem ol kaliko blong klinim ples, oli wasem evriwan wanples, be ol samting olsem ol nektae mo ol top long silik, oli wasem wanwan.

Olgeta we oli wasem klos, oli jekem wanwan long ol klos ya fastaem blong luk sipos oli brok samples, o wan baten i lus. Oli somap niufala baten wetem masin, o wetem han nomo. Sipos i gat nid blong fiksimap wan klos, wan brata o sista we i gat gudhan blong somap i mekem.

I gat wan masin we i putum stamp long evri klos, blong i isi blong faenem wanwan long ol taosen klos we oli stap wasem mo aeanem. Long semtaem, masin ya i seraotem ol klos, olsem nao taem oli wasem mo aeanem olgeta, oli save tekem olgeta oli gobak long ol defren bilding we Betel famle blong Yunaeted Stet i stap long hem.

Olgeta we oli gat ekspiriens oli trenem ol niuwan. Maet niuwan i lanem blong mekem 20 defren wok. Wan long ol wok ya we i luk olsem se i isi nomo be i tekem taem blong lanemgud, hemia blong karemaot ol mak long ol klos. Niufala wokman i mas kasem save long saed blong ol defren kaen kaliko, mo stret teknik blong klinim olgeta.

Tajh, we i wok bitim wan yia haf long ples blong wasem klos, hem i tokbaot olgeta we hem i wok wetem, i se: “Mifala evriwan i frengud. Mi laekem tumas blong wok wetem olgeta we oli kamaot long ol defdefren ples mo famle.” Shelly, we hem tu i wok long ples ya, i talem se: “I wan blesing blong halpem Betel famle blong luk naes oltaem.”