Long Fraede 5 Julae 2013, ol memba blong Betel blong Yunaeted Stet oli sek blong harem nius ya we Anthony Morris, wan memba blong Hed Kampani i talem. Hem i talem se: “Mifala i mekem desisen blong salemaot sikis bilding. Bilding we i stap long 117 Adams Street mo 90 Sands Street long Brooklyn, hemia tu i stap long lis. a Wok blong muvumaot ol samting long bilding 1 kasem 5, i mas finis long medel blong Ogis long yia ya.”

Hemia wan bigfala wok blong mekem. Spes insaed long ol faef bilding ya, i sem mak long saes blong 11 futbol fil long ol bigfala stadium. !Mo oli mas muvumaot evri samting long ol bilding ya, long 60 dei nomo!

Long ol yia we oli pas, oli yusum Bilding 1 kasem 5 blong printim ol buk mo putumgud tugeta, be long 2004 oli muvaot long bilding ya mo go long Wallkill, Niu Yok.

Stat long taem ya, oli yusum bilding 1 kasem 5 blong putum ol samting blong mentenens, konstraksen, mo ol jea mo tebol blong ofis, mo sam narafala samting blong yusum long wok blong konstraksen long Yunaeted Stet mo ol narafala kantri.

I mas gat wan gudfala plan, from we i gat 60 dei nomo blong muvumaot ol samting long ol bilding ya. Fastaem, oli mekem wan lis blong ol samting long bilding ya we oli mas salem, sakemaot, no kipim. Biaen, oli mekem plan blong muvumaot gud ol samting.

Ol memba blong famle long Betel blong Yunaeted Stet, oli wok had blong sapotem wok ya. Mo tu, i gat 41 volontia we oli kam blong givhan, mo oli stap smoltaem long Betel. Ol volontia ya oli kam long ol defren pat long Yunaeted Stet. Bighaf blong olgeta oli ol yangfala boe we oli strong, mo oli no mared. Oli glad nomo blong kam wok long Betel. Wok ya bambae i gohed blong sikis kasem ten wik, hemia i mekem se oli mas lego ol famle, ol fren, mo wok we oli stap mekem, blong oli save kam long Betel. ?Wanem tingting blong olgeta long wok ya long Betel?

Jordan, we i gat 21 yia mo i kam long Washington State. Hem i talem se: “Mi wantem hareap blong putum leta blong mi blong go long Betel.”

Steven, we i gat 20 yia mo i kam long Texas. Hem i talem se: “Mi harem se mi haf blong wan bigfala famle long fulwol we oli glad mo oli wok had.”

Justin, we i gat 23 yia i talem se: “Taem mi stap long Betel, mi harem olsem se mi stap long haos blong mi. Ol save we mi kasem mo lav we ol brata mo sista oli soem, i bigwan tumas.”

Adler, we i gat 20 yia mo i kam long Poto Riko. Hem i talem se: “I hadwok blong girap eli long moning, be mi faenem ol fren we bambae i stap blong olwe.”

William, we i gat 21 yia i talem se: “Stat taem mi smol, mi wantem tumas blong wok long Betel. Mi ting se bae mi neva mekem, be tingting ya blong mi i no tru. !Wok long Betel hem i beswan ekspiriens we mi gat long laef! I no gat wan samting we mi save tingbaot se i gud moa, i bitim taem we mi stap long Betel.”

?Olsem wanem? ?Oli muvumaot evri samting long 60 dei? Yes, be oli mekem long 55 dei nomo.