Long 2015 klosap 175,000 visita oli visitim branj ofis blong ol Witnes Blong Jehova long Sentrol Amerika we i stap long Meksiko. !I olsem se i gat wan avrej blong 670 man oli kam visit long evri dei blong wok! Plante long ol visita oli kam long ol bigfala grup, oli bukum ol bus mo oli travel blong plante dei blong kam. Samfala oli mekem plan plante manis finis blong oli save kam visit.

Samfala we oli kam blong visitim branj ofis, we hemia Betel, oli traehad blong mekem sam samting blong oli save kam visit. Eksampol, plante long ol Witnes we oli blong wan kongregesen long ples ya Veracruz long Meksiko, oli nogat mane blong pem trip blong bus we bambae oli travel 550 kilometa. Taswe oli wokem wan plan we oli kolem se “Projek Blong Betel.” Oli mekem ol grup blong kukum mo salem ol kakae. Mo tu oli pikimap ol plastik botel blong salem. Afta long tri manis, oli kasem i naf mane blong pem rod blong olgeta blong kam visit.

?Olsem wanem? ?Oli glad long visit blong olgeta? Yes oli haremgud tumas. Eksampol, Lusio, wan yangfala man long kongregesen, i raetem se: “Visit we mifala i mekem long Betel i pulum mi blong putum sam moa mak long saed blong spirit, mo naoia mi stap mekem moa wok long kongregesen blong mi.” Mo Elisabet, we i gat 18 yia, i talem se: “Taem mi visitim Betel, mi save luk mo harem save trufala lav we i makemaot olgeta we oli mekem wok blong Jehova. Samting ya i pulum mi blong wantem mekem moa long wok blong Jehova, taswe mi kam wan fultaem paenia.”

Sam samtaem, i gat taosen visita oli kam blong visit long sem dei. Man we i lukaot long ol Tua i wok had blong welkamem ol visita. Lisi i talem se: “I naes tumas blong luk plante visita we oli kam. Taem mi luk we ol visita oli glad tumas mo mi harem ol samting we olgeta oli mekem blong oli save kam visitim branj, hemia i mekem bilif blong mi i strong.”

Blong mekem tua long ol plante visita we oli kam, olgeta we oli gat ol narafala wok blong mekem long Betel, oli givhan tu blong mekem ol tua. Nating se i wan narafala wok blong mekem, be oli glad blong mitim ol visita. Juan i talem se: “Afta we mi mekem wan tua, mi luk se ol visita oli hapi mo mi save se mi mekem wan gudfala samting.”

Ol pikinini tu oli haremgud blong visitim Betel. Noriko we i wok long Kompiuta Dipatmen, i se: “Mi askem long wan grup blong ol pikinini we oli kam visit, sipos oli wantem wok long Betel. Evriwan oli talem se, ‘!Yes!’” Wan beswan ples blong wan long ol pikinini ya hemia “Ples Blong Kaleb.” Long ples ya, oli save tekem ol foto wetem ol bigfala pija blong Kaleb mo Sofia, we tufala i stap long video ya Kam Fren Blong Jehova. Noriko i se: “Ol pikinini oli laekem tumas.”

Plante pikinini oli talemaot se oli glad tumas long ol wok we i stap gohed long Betel. Eksampol, Henri we i wan smol boe long Meksiko, i stap sevem mane blong hem long wan bokis blong mane. Hem i mekem olsem blong givim olsem presen mane taem hem i kam long Betel. Hem i raetem wan leta mo i givim wetem presen mane ya, i se: “Plis yufala i yusum mane ya blong wokem plante moa buk.” Mo hem i talem se, “Tangkiu we yufala i wok blong Jehova.”

Ol Witnes blong Jehova raon long wol oli mekem ol fri tua long ol ofis blong olgeta mo ol ples blong printim ol buk blong olgeta. Sipos yu wantem visitim wan branj ofis, yu yu welkam blong kam. Mifala i sua se bambae yu glad long visit blong yu. Yu save faenem moa infomesen long saed blong ol tua long haf ya, MIFALA > VISITIM OFIS BLONG MIFALA.