Foti yia bifo, long 2 Februari 1973, oli setemap ol niufala masin long Wallkill, New York, Yunaeted Stet, blong wokem ol Wajtaoa mo Wekap!

Ten yia bifo, ol Witnes blong Jehova oli pem wan fam blong givim kakae long olgeta we oli wok long hedkwota long Brooklyn, New York. Be naoia oli yusum fam ya blong givim wan narafala kakae tu, we i kamaot long Tok blong God.—Matiu 24:45-47.

Long taem ya, Philip Wilcox i lukaot long wok blong ranem ol masin blong printim buk, mo hem i tokbaot fas dei we ol masin ya oli wok long Wallkill, i se: “I tekem wan manis blong setemap ol masin ya we oli spid blong printim ol buk. Taem oli rere, mifala i traem olgeta. I no longtaem, mifala i printim sam taosen magasin. Mifala i no wantem westem wan magasin, taswe, nating se i wan tes nomo, be mifala i tekem ol magasin ya oli go long Brooklyn, blong oli sanemaot long ol kongregesen.”

Ol Witnes blong Jehova oli bildim niufala haos ya blong printim ol buk, blong givhan long bigfala wok we i stap gohed long Brooklyn. Jes afta long 1970, olgeta long Brooklyn oli no naf blong printim ol buk mo Baebol we ol Witnes oli nidim long ol dei we oli wok, taswe oli stat blong wok long naet tu.

Faswan bilding we oli wokem long Wallkill, hem i naf blong putum fo bigfala masin blong printim ol buk long hem, wetem dipatmen blong sanemaot ol buk, mo wan Haos Kingdom. Be bifo we oli yusum bilding ya fulwan, oli stat blong joenem i kam bigwan moa. Blong printim ol buk we ol Witnes oli nidim, oli setemap sikis moa masin long niufala bilding ya, nating se oli no finisim gud yet.

Long ol yia we i pas, teknoloji long saed blong printim ol buk i kam antap, mo nid blong ol buk we oli tokbaot Baebol i kam bigwan moa. From samting ya, plante taem mifala i mas pem ol niufala masin mo wokem ol niufala bilding long Wallkill. Long ol yia 1980, ol niufala masin we oli ron spid blong printim ol buk (offset) oli tekem ples blong ol olfala masin we man i mas rerem ol wanwan leta long ol pej (letterpress).

Long 2004, oli klosem ples blong printim ol buk long Brooklyn, mo oli stat blong wokem ol buk long Wallkill. Long 2010, wok blong printim ol magasin i go long branj ofis blong ol Witnes blong Jehova long Kanada. Niufala masin long ples ya i printim 200,000 magasin long wan aoa.

Tede, ples blong printim ol buk long Wallkill i gat ol laswan masin we oli jes kamaot, mo i gat 280 man mo woman we oli glad blong wok long ples ya. Las yia, oli wokem bitim 17 milian buk mo Baebol. Antap long Wallkill, Kanada, mo Meksiko long Not Amerika, ol Witnes blong Jehova oli gat 12 narafala ples blong printim ol buk, long Afrika, Esia, Ostrelia, Saot Amerika, mo Yurop. Hemia i givimaot ol save blong God i go long plante milian man.—Matiu 5:3.