“!Faea! !I gat wan faea!” Sandra we i stap dring ti long haos blong mama mo papa blong hasban blong hem, i luk faea i stap laet aninit long doa blong wan smol haos klosap long haos blong olgeta. Hem wetem hasban blong hem Thomas, i kwik blong mekem wan samting. Taem Sandra i go blong karem samting blong sutum faea (fire extinguisher), Thomas i ron i go long smol haos ya blong traem faenemaot se wanem i rong. Ale Sandra i hareap, i kam givim samting ya long Thomas, nao hem i kilim ded faea ya. Sandra i talem: “Sipos mifala i no save yusum samting ya (fire extinguisher) bambae smol haos ya i bon fulwan.”

?From wanem Thomas mo Sandra i no fraet be tufala i kwik blong tekem aksen? Hemia from we tufala i bin stap insaed long grup blong samwe long wan taosen narafala we oli wok long branj ofis blong ol Witnes blong Jehova long Selters Jemani, we oli tijim olgeta olsem wanem blong kilim faea.

Long Selters, i gat ol ofis, ol haos blong slip, wan ples blong was, wan ples blong printim ol buk, mo i gat plante woksop—hem i wan eria blong 30 hekta mo i isi nomo blong faea i kamaot long hem. Taswe dipatmen we i lukaot long sefti mo envaeronmen i mekem wan program blong tijim ol man olsem wanem blong blokem mo kilim faea. Fastaem, wan grup we i stap olsem Tim Blong Emejensi, oli praktis wetem olgeta long faea dipatmen. Mo biaen, evri volontia long branj oli mekem ol samting ya:

• Oli praktis blong tekemaot ol samting i go long sefples.

• Oli lanem olsem wanem blong kilim faea long wan fasin we i sef.

• Oli lanem blong kilim faea taem i jes stat.

Ol volontia ya oli lanem sam impoten samting we oli save mekem taem i gat wan emejensi.

Olgeta we oli joen long trening, oli lanem long taem blong praktis olsem wanem blong kilim faea long fasin we i sef. Wan woman nem blong hem Kristin i bin lanem olsem wanem blong kilim ded wan faea taem hem i stap long praemari skul. Hem i tokbaot trening ya long branj, i se: “Mi karem samting blong kilim faea, mi openem mo mi go klosap long faea long saed we win i stap blo long hem. From sipos no bae faea i save bonem mi. Biaen mi kilim faea mi wan nomo. Mi lanem tu olsem wanem blong kilim faea wetem wan tim blong fo o faef man.”

Daniel we i stap tijim ol man olsem wanem blong kilim faea we i wok long branj ofis, i talem se: “Long taem blong praktis, oli no moa fraet long faea.” Hem i eksplenem se: “Taem i gat wan faea i laet, plante taem ol man oli fraet, oli konfius, mo oli stap tingting se, ‘?Bambae yumi mekem wanem? ?Olsem wanem blong yusum samting blong kilim faea (fire extinguisher)?’ Be sipos oli save wanem blong mekem, oli save stopem smol faea ya blong i no bonem evri samting.” Mo hem i gohed se: “Olgeta we oli joen, oli glad tumas blong save olsem wanem blong holem samting blong kilim faea (fire extinguisher) mo olsem wanem blong kilim faea. Oli gat strong tingting mo oli no fraet blong tekem aksen kwiktaem sipos i nidim.”

Plante long olgeta oli glad tumas long trening ya. Kristin we yumi tokbaot hem finis i talem se: “Fastaem long laef blong mi, mi holem wan samting blong sutum faea (fire extinguisher). Long tingting blong mi, evriwan i sud kasem ol trening olsem.” Nadja we i wok sam samtaem olsem wan volontia long branj ofis, mo i wok tu long epot, i talem se: “Long ol ten ya we i pas, long epot, oli talem nomo long mi olsem wanem blong kilim faea be oli no soem olsem wanem blong mekem. Be trening we mi kasem long branj ofis i mekem mi mi gat strong tingting mo mi no fraet. Sipos i gat wan faea, bambae mi save wanem blong mekem.”

Sandra i sua se trening we hem i kasem long branj ofis, i mekem se hem i save tekem aksen kwiktaem blong stopem faea, taem hem i stap long haos blong papa mo mama blong hasban blong hem. Hem i talem se: “Mi no moa fraet tumas blong yusum samting ya blong kilim faea (fire extinguisher). I gud sipos yumi gat trening olsem evri yia. Trening ya i halpem mi bigwan.”

Klosap oltaem lokol faea dipatmen i kam mekem ol trening long branj ofis. Theo Neckermann we i lukaot long tim blong lokol faea dipatmen ya i talem se: “Dipatmen blong mifala i lukaot long minisipol eria blong Selters, we i wan eria aotsaed long taon. Plante taem mifala i stap kilim faea nomo long ol haos blong ol famle o ol haos we man i rentem. Be ol bilding long branj ofis ya oli defren, from we i gat plante bilding long wan bigfala eria, ol bilding oli bigbigfala, mo i gat plante bigfala wok we i stap gohed long ples ya. Taswe, i nidim blong mekem sam moa trening blong save kilim faea long wan ples olsem. Mo mifala i glad tumas blong kam mekem wan trening olsem long ples ya.”

I gat moa long 100 memba blong branj we oli kasem trening blong tekemaot ol samting mo olsem wanem blong kilim faea wetem olgeta long lokol faea dipatmen. Masta Neckermann i talem se: “Mifala i glad tumas long emejensi tim blong yufala. Wetem help mo daereksen blong olgeta, hemia i mekem se trening ya blong kilim faea mo faea emejensi operesen i go gud nomo.”

Long Februware 2014, i gat wan samting i hapen we i soemaot se olgeta long Faea dipatmen mo Tim Blong Emejensi oli bin kasem gudfala trening taem oli stap tren. Wan long ol haos blong branj ofis i fulapgud long smok. Daniel we yumi tokbaot hem finis i talem se: “Smok ya i bigwan tumas. Taem mifala putum han blong mifala long fored blong fes blong mifala, mifala i no save luk ol han blong mifala.” Hem i gohed se: “Kwiktaem nomo mifala i ringim olgeta long dipatmen blong faea, mo mifala i stat blong tekemaot ol man we oli stap long 88 rum blong haos ya. Taem olgeta long dipatmen blong faea oli kamtru, mifala i tekemaot finis evri man we i stap long haos ya.” Mr. Neckermann i talem se: “Mi sapraes we yufala i save tekemaot ol man kwiktaem olsem long wan bigfala haos olsem we i sem mak long ol narafala haos long taon blong Frankfurt. !Yufala i folemgud ol samting we yufala i lanem, mo Tim Blong Emejensi blong yufala i nambawan!” Ol man blong faea oli faenemaot denja mo oli karemaot. I no gat wan i kasem kil, mo i no gat bigfala damej long haos ya.

Evri man long branj ofis long Selters oli hop se bambae i neva gat wan faea i kamaot long ples ya. Be sipos i hapen, ol volontia ya oli rere finis from we oli lanem olsem wanem blong kilim faea.