Plante taem, i isi blong ol man we oli kasem ol bigfala sik oli wari, mo sipos i nidim man blong lukaot long olgeta, bambae oli harem nogud moa. Wan niuspepa we i tokbaot ol save long saed blong helt i talem se, “Ol stadi oli soemaot se fasin blong yumi blong kea long ol filing mo ol nid blong olgeta long saed blong spirit, i impoten tumas long helt blong olgeta.” a

Ol Witnes blong Jehova oli mekem olsem taem oli yusum Baebol blong leftemap tingting blong olgeta mo givhan long ol Witnes we oli slip long hospital. Ol elda oli ol faswan blong go visitim ol memba blong kongregesen blong olgeta we oli sik. ?Be olsem wanem sipos wan Witnes we i sik i go long wan hospital we i stap longwe long ples blong hem blong kasem tritmen? Long ol bigfala ples raon long wol, ol Witnes blong Jehova oli wokem ol grup blong visitim ol sikman, mo oli kolem olgeta ol PVG (Patient Visitation Groups). Oltaem ol elda blong kongregesen we oli joen long grup ya, oli visitim ol hospital blong halpem ol Witnes we oli sik mo ol famle blong olgeta we oli kam long ol narafala eria o long narafala kantri blong kasem tritmen. Bitim 28,000 volontia we oli mekemap 1,900 grup blong ol PVG long sikis defdefren kontinen. b

Wan memba blong PVG we nem blong hem Wiliam i se: “Mi mi bin leftemap tingting blong ol Witnes mo ol famle blong olgeta we oli no Witnes, taem mi toktok nomo mo mi lesin long olgeta. Mi givhan long olgeta blong tingbaot se Jehova God i luk ol trabol blong olgeta mo i kea long olgeta. Olgeta we oli sik mo ol famle blong olgeta oli haremgud tumas taem mifala i prea wetem olgeta.”

Plante oli talem tangkiu from ol samting we ol PVG oli mekem blong leftemap tingting blong olgeta. Hemia sam eksampol long Amerika we klosap 7,000 memba blong PVG oli visitim ol sikman.

• Presila i talem se: “Tangkiu blong kam visitim papa blong mi afta we hem i kasem strok. !Visit we yufala i mekem i tajem hat blong hem! Hem i glad tumas se yufala i ogenaesem wan samting olsem. Mi ting se visit blong yufala i givhan long hem blong i kam gud hareap.”

• Ofilia we mama blong hem i ded, i talem long brata we i lukaot long grup blong PVG se: “!Visit blong yufala i mekem mama blong mi i glad tumas! Hem i save se Jehova nao i sanem yufala. Tangkiu blong soemaot se yufala i lavem hem mo kea long hem.”

• Wan sikman i harem nogud mo i wari tumas afta we hem i harem nius se bambae hem i no moa save gohed blong laef. Jemes we i wan memba blong PVG i spenem taem wetem hem mo serem naesfala toktok blong Baebol we i stap long Filipae 4:6, 7. Jemes i talem se: “!Nekis dei, taem mi go visitim hem, hem i jenis bigwan. Nating se hem i kasem wan bigfala sik, naoia hem i gat hop se Jehova bambae i givhan long hem, mo hem i leftemap tingting blong mi!”

Polin, we hasban blong hem i ded long wan hospital we i stap longwe long ples blong tufala i raetem se: “Tangkiu tumas long samting we yufala i mekem blong givhan long famle blong mifala long hadtaem ya we mifala i fesem. Nating se yufala i mas go wok long nekis dei, be yufala i kam luk mifala long medel naet. Hemia i rili leftemap tingting blong mifala. Tangkiu blong mekem program blong 11 long mifala i gat taem blong stap wetem hem long hospital, mo tu tangkiu we yufala i stap wetem mifala taem mifala i gotru long hadtaem ya. Mi talem tangkiu long Jehova mo ogenaesesen blong hem blong givim ol help olsem we oli leftemap tingting.”

Niki, Gayle, mo Robin oli aksiden long trak samwe long 300 kilometa longwe long ples blong olgeta. Karlos, we i wan memba blong PVG, i harem nius mo i go long hospital blong mitim olgeta taem oli karem olgeta i kam long hospital. Karlos i talem se, “Mi wantem halpem olgeta long eni samting we oli nidim, nao mi holem smol dog blong Niki taem hem i go insaed blong kasem tritmen.” Nao Kertes we i wan narafala memba blong PVG, i kam wetem waef blong hem. Olgeta evriwan oli stap long hospital kasem we ol narafala famle blong trifala oli kam sam aoa biaen. Wan man we i stap long taem ya i talem se: “Trifala i harem gud tumas long samting we grup ya i mekem. Mo tu Robin, sista blong Niki we i no wan Witnes blong Jehova i glad tumas long help we ol memba blong PVG oli mekem.”