Long Spen, ol Witnes blong Jehova oli stap visitim 68 prisen, mo oli mekem Baebol stadi long 600 prisena.

Miguel i wan Witnes we i stap mekem ol visit ya. Hem i bin spenem 12 yia long prisen bifo we hem i kam wan Witnes. Naoia hem i stap gobak long prisen evri wik. ?From wanem? Hem i wantem halpem ol narafala blong oli jenisim laef blong olgeta, olsem we hem i mekem.

Long eit yia we i pas, Miguel i mekem Baebol stadi wetem plante prisena. Hem i talem se: “Mi mi glad blong halpem ol prisena long prisen ya we mi stap long hem bifo. Taem mi luk we oli wantem tumas blong kamaot long rabis laef ya blong brekem loa, mi harem gud tumas.”

Taem Miguel i gat fo yia, papa blong hem i ded taem wan man we i drong i sperem hem long trak. Mama blong Miguel i mas wok had oltaem, blong kasem naf mane blong pem ol samting we famle i nidim.

Miguel mo bigfala brata blong hem, tufala i stap mestem ol klas long skul, nao tufala i stat blong stil long ol haos mo ol trak. Taem Miguel i gat 12 yia, hem i wan kriminol we i stilim ol smosmol samting. Taem hem i gat 15 yia, hem i stap winim plante mane from we hem i stap salem ol drag. Be hem i stil moa blong pem ol drag ya heroin mo koken we hem i dipen long olgeta. Stat taem hem i gat 16 yia, hem i stap long prisen plante taem, mo i kam wan stronghed kriminol. Hem i talem se: “Mi bin ting se bae mi ded long prisen, sipos no, bae mi ded from mi tekem tumas drag. Mi harem se mi fas long wan trap olsem wan flae we i fas long net blong spaeda.”

Long 1994, wan fren blong Miguel i askem long wan Witnes blong i raetem leta long Miguel, we i stap long prisen. Taem Miguel i ridim leta ya, hem i kasem save se plan blong God i blong mekem wol ya i kam paradaes bakegen. Witnes ya i pulum Miguel blong jenisim laef blong hem, blong i save luk promes ya i kamtru. Miguel i talem se: “Leta ya i tajem hat blong mi. Long dei ya, laef blong mi i jenis, mo mi mekem desisen blong stadi Baebol. Be mi save se bambae i no isi.”

Miguel i save se bambae i had from we hem i stap dipen long ol drag mo tabak. I isi nomo blong hem i kasem olgeta. Man we i serem rum blong hem long prisen, i wantem givim ol drag long hem evri dei. Oltaem Miguel i prea blong kasem paoa blong winim fasin ya, mo sloslo hem i winim.

Tri manis biaen, Miguel i stat blong tokbaot bilif blong hem wetem ol narafala prisena. Wan yia biaen, oli letem hem i go fri long prisen, mo hem i baptaes blong kam wan Witnes blong Jehova. Hem i gat plan blong mared tu, be wan problem i blokem. Wan manis bifo long mared, kot i panisim Miguel se hem i mas stap ten yia moa long prisen, from sam narafala samting we hem i mekem bifo. Be afta we hem i stap tri yia haf, oli letem hem i go fri from gudfala fasin blong hem. Long taem ya nao, hem i mared. Miguel i neva gobak long olfala rabis laef blong bifo.