Long 6 Mei 2017, samwe 130 Witnes blong Jehova oli givhan blong klinim Bryukhovychi Forest klosap long Lviv, Yukren. Yia blong ol volontia ya, i stat long 22 kasem 80 yia. Olgeta ya oli laef mo oli wok long branj ofis blong ol Witnes blong Jehova long Yukren, we i stap klosap long forest ya. Oli klinim wan eria blong 50-hekta mo long 3 aoa nomo, oli hivimap samwe 600 kilogram blong ol doti.

Mykhailo Splavinskyi, wan enjinia long Lviv Forest Breeding and Drilling Center, i talem se: “Ol Witnes blong Jehova oli faswan blong sapotem klinap ya we mifala i stap mekem evri yia. Mo oli stat long yia 2014 finis i kam.”

Mr. Splavinskyi i talem se: “Ol doti oli kam long ples ya long tu rod. Faswan, ol doti we ol man oli lego i stap. Namba tu, ol doti blong konstraksen mo ol narafala doti we ol man oli karem long trak i kam mo sakem long ples ya.”

Doti i wan bigfala problem blong ol eria olsem. Mr. Splavinskyi i talem se: “Ol doti i tekem longtaem blong roten. Ale i posenem wota insaed long graon, mekem se i gat problem long envaeronmen.” Ol glas we i stap olbaot, san i save bonem olgeta nao oli save statem bus faea. Mo tu ol brokbrok glas mo ol nidel blong stik meresin, oli denja tumas, speseli long ol smol pikinini. Mr. Splavinskyi i gohed se: “Yumi save blokem ol problem ya taem yumi karemaot ol doti ya.”

I no isi blong klinim 3,300-hekta blong wan forest. Hem i gohed se: “Mifala i gat faef gad nomo blong lukaot long ples ya. Taswe, mifala i no naf blong klinim bigfala eria ya. From samting ya, wan taem evri yia, mifala i askem long pablik blong oli save kam joen blong klinim.”

Ol Witnes ya oli reregud. Oli werem ol glaf, karem ol plastik doti mo ol rek, nao oli go pikimap ol botel, wil blong trak, glas, aean, pepa, plastik, mo ol stik meresin we man i yusum finis. From samting ya, Ihor Fedak we i man blong lukaot long ol tri, i talem se: “Eria we ol Witnes blong Jehova oli lukaot long hem, i klin we i klin.”

Ol volontia ya oli seraotem ol doti i go long ol defren grup—ol glas, pepa, mo plastik, nating se i no gat wan loa yet long saed ya. Long fasin ya, oli save mekem risaekol long ol samting ya. Biaen oli karem ol doti ya i go long wan kampani blong doti, blong i spolem. Stat long yia 2016 finis, ol Witnes oli glad nomo blong pem blong sakem ol doti blong olgeta we oli hivimap. Mr. Fedak i talem se: “Mi mi talem tangkiu long ol Witnes blong Jehova blong halpem mifala. Oli givhan long mifala bigwan.”

Ol Witnes oli glad tumas blong joen long klinap ya evri yia. Oli wantem halpem ol man long komuniti blong gat wan gud laef mo blong givhan blong lukaot gud long forest ya. Volker i talem wan tingting we evriwan oli gat, i se: “Mi mi luk se fasin ya blong klinap i impoten tumas. I wan ona blong mekem wan samting blong ol narafala, mo i mekem mi mi glad.”

Wan woman, Anzhelika, i gohed i se: “Mi mi no stap tingbaot se hu i lego ol doti ya i stap, be impoten samting se, mi mi save mekem wanem blong karemaot ol doti ya.” Lois, wan woman we i gat 78 yia, hem tu i joen long klinap ya. Hem i talem se: “Taem yu go wokbaot, nao yu luk wan doti, i moa gud yu pikimap mo sakem long stret ples, i bitim we yu harem nogud from.”

Wan narafala man nem blong hem Wieslaw i se: “Plante taem ol man oli luk we mifala i dresap gud mo werem nektae mo rere blong tokbaot bilif blong mifala. Be mifala i rere tu blong wokhad, blong klinim wan forest, o mekem ol narafala wok blong givhan long ol man.”