Long Jun 2013, bigbigfala ren i foldaon nao ol reva oli fulap, mo i mekem wota i kam antap long Sentrol Yurop. Long Hangari, reva ya Danube i kam antap gogo i bitim mak blong hem. Hemia i neva hapen bifo.

Ministri blong Human Risos long Hangari i askem long branj ofis blong ol Witnes blong Jehova sipos ol Witnes oli save givhan blong blokem wota ya. Ale branj ofis i askem long olgeta kongregesen we oli stap long saed blong Danube Reva, blong oli joen wetem ol grup blong ol man we oli stap mekem sam samting blong blokem wota ya. Olgeta evriwan oli wok aninit long sam haeman.

Ol brata sista long ol kongregesen ya oli glad blong givhan. Long nekis dei, i gat moa long 900 Witnes we oli kamaot long 72 kongregesen, oli joen blong putum sam samting long saed blong reva, blong wota i no kam antap. Ol haeman ya oli askem long ol Witnes blong oli werem wan baj we oli raetem nem blong olgeta, taon blong olgeta, mo toktok ya “Witnes blong Jehova” long hem.

Wan haeman blong Red Kros long wan taon blong Hangari i sanem wan mesej i go long wan kongregesen, i se: “Mifala i respektem yufala mo mifala i talem tangkiu tumas long yufala from we yufala i joen gud mo yufala i glad blong kam givhan, nating se yufala i stap longwe tumas. !I no evri man we oli gat fasin olsem! !Mi praod blong tokbaot gudfala eksampol blong yufala, long taon blong yumi!”

Jeaman blong wan ogenaesesen we i lukaot long wok blong givhan long taem blong disasta mo i wan memba blong palemen blong Hangari, i sanem wan leta i go long branj ofis blong talem tangkiu long ol Witnes from gudfala wok we oli mekem long taem blong disasta.