Long ol yia we oli jes pas, wan bigfala namba blong ol refuji long Afrika, Medel Is, mo Saot Esia oli ronwe i go stap long Yurop. Blong halpem olgeta, sam oganaesesen blong gavman mo ol lokol volontia oli wok tugeta blong givim kakae, ples blong slip, mo meresin.

I tru se ol refuji oli nidim moa ol samting blong givhan long laef blong olgeta. Be plante long olgeta oli stap harem nogud long tingting blong olgeta, taswe oli nidim tu ol gudfala toktok we i leftemap tingting mo i givim hop. Ol Witnes Blong Jehova long Sentrol Yurop oli wantem tumas blong givhan long olgeta. Oli mekem olsem taem oli lesin gud long ol refuji mo serem ol gudfala toktok blong Baebol wetem olgeta.

Long Ogis 2015, bitim 300 kongregesen blong ol Witnes long Ostria mo Jemani oli mekem wan spesel traehad blong leftemap tingting blong ol refuji. Mo oli faenem se ol refuji oli glad moa blong tokbaot ol ansa we Baebol i givim long ol kwestin ya:

• ?From wanem yumi stap safa?

• ?Wanem i hapen taem man i ded?

• ?Wanem ol gud nius we i stap long Baebol?

• ?God i gat wan nem?

• ?Ol Witnes Blong Jehova oli hu?

Bitwin Ogis mo Oktoba 2015, ol lokol Witnes oli odarem bitim 4 tan blong ol buk we i tokbaot Baebol long branj ofis blong Sentrol Yurop mo oli givimaot fri nomo long ol refuji.

Plante long ol refuji oli toktok nomo prapa lanwis blong olgeta. Taswe ol Witnes oli yusum ol atikol mo ol video we oli stap long plante handred lanwis long jw.org websaet. Matias mo Petra we oli volontia long Erfurt, Jemani oli se: “Samtaem mifala i mekem saen long han mo fes, blong toktok wetem olgeta o yusum ol pija mo ol samting we mifala i droem.” Mo tu oli yusum JW Language, wan app blong lanem lanwis we i halpem ol Witnes blong tokbaot ol mesej blong Baebol long ol refuji long prapa lanwis blong olgeta. Samfala oli yusum JW Library app blong ridim ol vas blong Baebol mo soem ol video long ol defren lanwis.

Wan kapol we i Witnes mo i blong Schweinfurt, Jemani i talem se: “Plante man oli kam raonem mifala.” Wolfgang, wan volontia long Diez, Jemani i talem se: “Long 2 mo haf aoa nomo, ol refuji oli glad blong tekem 360 buk. Plante long olgeta oli bodaon smol blong talem tangkiu long mifala.” “Ol refuji oli glad se i gat man i intres long olgeta. Samtaem oli askem ol buk long faef o sikis defren lanwis.”

Plante long olgeta afta we oli tekem ol buk ya oli stat blong ridim olgeta. Mo samfala oli kambak blong talem tangkiu long ol Witnes. Wan Witnes long Belin, Jemani, Ilonca i talem se: “Tu yang man i tekem sam buk, be long haf aoa biaen tufala i tekem sam bred i kambak blong givim long mifala. Mo tufala i talem sori from we tufala i nogat wan samting blong givim blong talem tangkiu.”

Ol man we oli stap lukaot long ol refuji, ol bigman blong gavman, mo ol neba oli talem tangkiu long ol Witnes from volontia wok we oli mekem. Wan man we i lukaot long 300 refuji i talem se: “!Tangkiu!” “Tangkiu tumas blong tingbaot nid blong ol man we oli kam long ol defren ples!” Wan narafala man blong lukaot long ol refuji i talem long ol Witnes se samting we oli givim long ol refuji blong oli save ridim long prapa lanwis blong olgeta, i gud tumas, “from we evridei oli stap kasem ol kakae nomo blong kakae tri taem long wan dei.”

Marion mo hasban blong hem Stefan we oli laef long Ostria, oli eksplenem risen blong volontia wok we oli mekem long tu polis we oli stap jekem ol samting. Tufala polis ya i talem tangkiu long tufala mo oli askem tu buk. Marion i talem se: “Bakegen mo bakegen, polis i talem gudfala toktok long wok we mifala i mekem.”

Wan woman long Ostria we oltaem i stap givim ol samting long wan kamp, i makem se oltaem nating se weta i gud o nogud, be ol Witnes oli traehad blong halpem ol refuji. Wan dei hem i talem long olgeta se: “I tru se ol refuji oli nidim ol samting long laef, be samting we oli nidim moa hemia hop mo hemia nao samting we yufala i givim long olgeta.”