Long 2016, Ol Witnes Blong Jehova oli gat janis blong soem sam video mo sam atikol we i stap long websaet ya jw.org, long wan grup blong ol man we oli stap tij long Provins blong Zamboanga del Norte, hemia long Filipin. Fastaem, Ol Witnes oli go visitim Dipatmen blong Edukesen long taon blong Dipolog. Ol administreta long skul ya oli sapraes tumas blong luk websaet ya. Ale oli mekem wan miting wetem evri tija blong Zamboanga del Not, mo oli askem ol Witnes blong oli tokbaot websaet ya blong 30-minit. Mo tu, oli mekem tri defren miting wetem ol tija we oli blong ol defdefren taon.

Long wanwan miting, oli soem ol video mo ol atikol we i stap long websaet ya long 300 tija we oli stap long miting ya. Ol tija oli glad tumas long wan haf we i tokbaot fasin blong “Pembak Ol Kaon.” Plante tija oli talem se presentesen ya i no givhan long ol studen nomo, be i givhan long olgeta tu. Evri tija oli karem traket ya ?Weples Yu Save Fanem Ansa Blong Ol Impoten Kwestin? Hemia wan plan we i intresting, from i halpem man blong fanem ol infomesen long jw.org. Long taem ya, sam tija oli daonlodem ol video long websaet ya.

Trifala presentesen ya i mekem se oli faenem ol gudgudfala samting mo hemia i mekem se, Dipatmen Blong Edukesen i mekem plan blong oli save mekem moa presentesen long ol 600 man mo woman we oli stap givim advaes long ol studen mo sam narafala tija. Mo tu, long taem ya oli talem ol gudfala toktok long Ol Witnes Blong Jehova.

Samfala we oli stap long taem ya oli talem se ol presentesen blong websaet ya i rili halpem olgeta. Wan tija i talem se: “Mi wantem talem bigfala tangkiu, from mi fanem wan samting we i impoten blong tijim long ol pikinini.” Wan narafala tija i talem se: “Mi gat plante lesen blong lanem, speseli taem tingting blong mi i fasfas tumas. Websaet ya i givhan long ol yangfala mo ol olfala.”

Bitim 350 tija we oli stap long taem blong jw.org presentesen ya, oli askem sam moa infomesen. Ol Witnes oli givimaot sam moa buk mo magasin mo oli soem sam nambawan advaes we i kamaot long Baebol long olgeta we oli wantem save moa.

Ol Witnes oli sapraes tumas blong luk se i gat bitim 1,000 tija we oli stap long taem blong presentesen blong jw.org long Zamboanga del Not, mo oli luk se websaet ya i wan nambawan rod blong tijim ol man. Hemia wan impoten tul we i save givhan long ol tija raon long wol blong fanemaot bilif we i tru, mo blong luksave ol samting we i gud mo ol samting we oli nogud. Mo tu, blong oli lanem blong savegud Baebol. a