Graham Browne, we i gat 80 yia mo i wan Witnes blong Jehova, i givhan long wan man we i trabol gud long tingting blong hem, blong i no jam long Sky Tower long Auckland, Niusilan. Taoa ya i hae olsem 328 meta. Graham i talem se: “Man ya i wantem toktok wetem wan Witnes blong Jehova, ale ol polis oli ring long mi blong askem sipos mi save givhan long hem.

“Long Sky Tower, oli fasem wan strap long mi blong mi stap sef mo oli fasem Baebol long wan longfala rop. Nao polis i lidim mi i go afsaed long wan smol ples we man i save stanap long hem mo lukluk ol ples. Ples ya i hae olsem 192 meta. I gat wan strong win i blu mo i kolkol gud. Man ya we i wantem jam, i no longwe tumas long mi. Hem i stap sidaon long wan smol ples blong wokbaot, mo tufala leg blong hem i hang daon. I no gat wan samting i blokem hem blong i no foldaon.

“Mi singaot blong talem long hem se mi mi wan Witnes blong Jehova mo mi wantem halpem hem. Mi prea long tingting blong mi, nao mi openem Baebol mo mi stat blong toktok.

“Mi tokbaot respek long laef, hemia topik we mi bin tokbaot long wan tok we mi givim long Haos Kingdom i no longtaem.

“Mi talem long hem se: ‘God i lavem yu mo i givim wan nambawan presen long yu, hemia laef. I gud yu soemaot long hem se yu tinghae long presen ya. Plis, kambak biaen long fenis ya.’

“Mo tu, mi ridim sam vas blong Baebol, olsem Jon 3:16, we i talem se: ‘God i lavem tumas ol man long wol, nao hem i givim stret Pikinini blong hem, wan nomo we hem i gat, blong olgeta man we oli soemaot se oli bilif long hem, oli no ded be oli kasem laef we i no save finis.’

“Nao mi talem long hem se: ‘Yu luk. God i lavem yu tu mo i wantem se yu stap laef.’

“Fastaem i luk olsem se man ya i no stap lesin nating. Ale mi prea long Jehova long tingting blong mi, blong i halpem mi blong mekem man ya i kasem save. Sloslo, hem i girap mo i kam klosap moa long mi. Mi luksave se hem i harem nogud tumas.

“Hem i talem se: ‘I no longtaem i pas, ol Witnes blong Jehova oli kam long haos blong mi, be mi talem long olgeta blong gowe. Naoia mi harem nogud tumas from samting ya. Plis, ?yu save fogivim mi?’

“Mi talem long hem se: ‘Yu no wari, sam long mifala i mekem i sem mak bifo we mifala i kam ol Witnes. Yu save sua se Jehova bambae i fogivim yu.’

“Hem i talem se: ‘Tangkiu, naoia tingting blong mi i kwaet moa.’

“Mi mi gohed se: ‘Yu save, mi mi wari tumas. Oli fasem wan strap long mi blong mi sef, be yu, sipos yu glis, bambae yu lusum laef blong yu we i sas tumas. Hemia bambae i mekem Jehova i harem nogud tumas. Plis, yu kambak biaen long fenis ya we i sef.’

“Mi luksave se tingting blong hem i kam kwaet. Nao hem i talem long kwaet fasin se: ‘OK, bae mi kam.’

“Hem i kambak biaen long fenis mo kwiktaem nomo ol polis oli lidim hem i go long wan sefples. Mitufala i bin storian blong wan aoa.”

Ol Witnes blong Jehova oli rili kea long ol man, speseli olgeta we oli harem nogud tumas. Long olgeta ples long wol, oli yusum Baebol blong givim hop, kamfotem ol man, mo soemaot long olgeta se God i rili kea long olgeta.