Long 20 Mei 2015, hedgavman blong saot Rasia, bigfala taon blong Rostov-on-Don, i raetem wan leta blong talem tangkiu long ol Witnes blong Jehova “from gudfala wok we oli mekem blong klinimgud ol ples long taon ya, long taem we ol tri oli putum lif mo flaoa.”

Long dei we ol komuniti bambae oli klinim taon blong Rostov-on-Don, i gat fo kongregesen blong ol Witnes blong Jehova we oli givhan, oli pikimap ol doti we ol man oli sakem olbaot long taon ya mo long ol ples we man i wokbaot long olgeta mo long saedsaed blong reva. Long sam aoa nomo oli fulumap samwe 300 plastik bak blong ol doti, mo trak i kam karemaot.

?From wanem ol Witnes oli glad tumas blong givhan long komuniti? Raisa we i gat 67 yia, i talem se: “Mi no wantem stap defren long ol narafala. Mi wantem se taon blong mi i klin, blong evriwan oli save laef long wan ples we i klin. Nating se sam man nomo oli luksave wok we mifala i mekem, be yet mi glad tumas long wok ya. Mo tu, Jehova God i luk.” Wan man we i gat 66 yia i talem se: “Mifala i no prij nomo long ol man be mifala i mekem ol narafala wok tu blong halpem olgeta. Mi mi glad tumas se mi mekem wan wok we i givhan long ol neba blong mi.”

Ol man raonabaot oli talem tangkiu long ol Witnes blong Jehova, from gladhat blong olgeta blong mekem wok. Wan man i sapraes taem hem i harem se ol Witnes oli no kasem pei from wok we oli mekem. Ale hem i mekem desisen blong joenem olgeta blong klinap, mo biaen hem i talem se: “!Mi neva tingbaot se yu save kasem bigfala glad taem yu mekem klinap, mo yu haremgud long hem taem i finis!” Mo hem i gohed i se: “!Sam long yufala, nating se yufala i no laef long ples ya, be yet yufala i kam blong klin ples blong mifala!”

Wan haeman blong gavman long taon ya, i makem se wan smol grup blong ol Witnes oli pikimap wan bigfala namba blong ol bag blong doti. Ale, hem i tekem foto blong ol bag ya we olgeta oli fulumap, blong hem i save “soem long ol narafala olsem wanem oli sud mekem wok ya.”