Hugo we i gat 10 yia, i kasem wan praes from hem i halpem ol studen long skul blong hem blong save ol rod blong winim wan stronghed. Praes ya oli kolem Diana Award mo wan ogenaesesen long Inglan i stap givimaot.

Hugo i talem se: “Mi mi kasem presen ya from video ya Yu Save Winim Wan Stronghed, we i stap long websaet ya jw.org. Ol save we mi kasem long video ya oli mekem se mi naf blong givhan long ol yangfala blong winim ol stronghed.”

Hugo i soem video ya long ol tija blong hem fastaem. Ol tija ya oli laekem video ya tumas, ale oli mekem se websaet ya jw.org i stap long intenet blong skul blong evri studen oli save go long hem. Naoia plante studen we oli gat 8 kasem 10 yia oli stap yusum jw.org oltaem. Oli talem se websaet ya i halpem olgeta blong save olsem wanem blong winim ol stronghed, mo i givim ansa long ol kwestin olsem, ?Olsem wanem blong gat ol trufala fren?

Long wan narafala skul long Inglan, Elaeja we i gat 8 yia i kasem trabol from ol stronghed long skul. From samting ya, hem mo famle blong hem oli wajem bakegen video ya, Yu Save Winim Wan Stronghed. Afta oli mekem wan pleplei tugeta, blong halpem Elaeja blong hem i save wanem toktok blong talem mo wanem fasin we hem i save mekem taem ol stronghed oli wantem spolem hem. Pleplei ya i mekem se Elaeja i harem se hem i naf, blong fesem ol stronghed mo winim olgeta. Biaen, long wik we ol studen oli mekem ol samting blong stopem ol stronghed, hed masta blong Elaeja i soem video ya long evriwan long skul.

Fasin ya we ol stronghed oli stap spolem narafala, i no stap hapen nomo long Inglan, hem i stap long olgeta ples long wol, be video ya i givhan long plante yangfala blong oli winim ol stronghed.

Long Amerika, wan gel nem blong hem Ivie we i gat 10 yia, i stap fraet long wan nara gel from we hem i stap spolem hem. Gel ya i stap long sem klas wetem Ivie. Be afta we Ivie i wajem video ya, Yu Save Winim Wan Stronghed, hem i no moa fraet long gel ya, from we hem i save wanem blong mekem sipos gel ya i wantem spolem hem. Mo tu hem i tokbaot problem ya long tija blong hem, nao tija i givhan long hem. Ale gel ya i talem sore long Ivie mo naoia tufala i gudfala fren.

Ol Witnes blong Jehova oli tingbaot ol yangfala, oli wantem se ol yangfala oli harem gud mo oli glad. Bambae mifala i gohed blong givim ol gudfala advaes olsem, we ol yangfala oli save folem blong winim ol trabol we oli kasem evri dei.