I gat naen Witnes blong Jehova long Ostrelia we oli kasem setifiket, from “gudfala wok” we oli mekem blong givhan long ol presina long wan bigfala kalabus long Ostrelia, we nem blong hem Curtin Immigration Detention Centre. Kalabus ya i stap klosap long Derby, long Wes blong Ostrelia. a

Evri wik, ol Witnes oli visitim ol presina ya mo oli harem ol stori blong olgeta, biaen oli tokbaot ol mesej blong Baebol we i leftemap tingting blong olgeta mo givim hop long olgeta. Christopher Riddoch, wan ofisa long kalabus we i lukaot long ol jos we oli kam visitim ol presina, i talem se: “Yu luksave kwiktaem nomo ol jenis we ol presina oli mekem, afta we oli storian wetem ol Witnes.” Hem i se, tingting blong ol presina i jenis bigwan mo oli glad afta we ol Witnes oli visitim olgeta. Hemia from we ol Witnes oli “soemaot se oli tingbaot olgeta we oli stap long kalabus.”

Mo tu, Mr. Riddoch i talem se setifiket we ol Witnes oli kasem, hem i wan saen blong talem tangkiu from we “oli halpem ol presina blong oli gat gudfala fasin.” Hem i gohed i se, ol Witnes blong Jehova “oli lukaot gud long famle blong olgeta, kongregesen blong olgeta mo bilif blong olgeta.”