Afta long bigfala ren we i foldaon long not Itali long en blong Novemba 2016, wota i kavremap sam vilej we oli stap long saot blong taon ya Moncalieri. Long sam ples, wota i kasem haf meta. Wan niuspepa i talem se “wota i kasem evri man mo evri samting.” Ol man we oli lukaot long ples ya oli muvumaot samwe long 1,500 man. I gud tumas we oli wok hareap, taswe i no gat wan man i ded. Nating se i olsem, ol man oli lusum plante samting.

Wantaem nomo ol Witnes oli stat blong wok. Oli digimaot sofmad long ol haos we wota i spolem, mo oli muvum ol samting olsem ol tebol, ol jea, mo plante samting blong ol wanwan man. Taem tu brata mo wan sista i karem sam tul mo hot kakae i kam, trifala i kasem wan rod we ol man oli blokem, be oli letem trifala i pas blong go givhan long wan famle we i nidim help. Ol volontia ya oli no givhan long ol narafala Witnes nomo, be oli givhan long olgeta tu we oli no Witnes.

Wota i go insaed tu long rum aninit long wan bilding we oli yusum olsem storum. Afta we ol man blong sevem ol man oli karemaot wota ya, wan bigfala hip blong ol Witnes oli givhan long Antonio we hem tu i wan Witnes, mo famle blong hem, blong oli karemaot sofmad long rum ya. Biaen, oli givhan long ol narafala tu we oli slip long sem bilding. Oli stanap long laen, mo kwiktaem nomo, oli karemaot evri samting blong ol wanwan famle long rum aninit long bilding ya. Evriwan oli glad tumas long help blong olgeta. Viviana, we hem tu i slip long bilding ya, i krae taem hem i talem long woman blong Antonio se: “Plis talem tangkiu blong mifala long ol brata blong yu. !Yufala i rili spesel!”

Long wan vilej we wota i spolem gud, ol man oli wajem ol Witnes we oli stap wok. Oli glad tumas long samting we oli luk, nao sam long olgeta oli wantem joen long wok we ol Witnes oli stap mekem, mo oli glad blong folem ol tok blong lida blong tim.

Bigfala wota ya i spolemgud haos blong wan man, mo sofmad i berem garaj blong hem. Be hem i glad tumas taem eit Witnes oli spenem fo aoa we oli no spel, blong klinim garaj ya. Taem wok i finis, hem i putum han blong hem i goraon long sam long ol Witnes ya blong talem tangkiu long olgeta. Mo tu, hem i putum stori ya long Intenet mo i talem tangkiu long “bigfala help” blong olgeta.

Wan Witnes i talem se: “Mifala i givhan long plante man we oli no Witnes, mo sam long olgeta oli gat bitim 80 yia. Samfala oli krae taem oli talem tangkiu long wok we mifala i mekem.” Wan long ol man ya we hem i stap go long Katolik jos, i glad tumas long wok blong ol Witnes, mo i talem se: “I gud tumas blong luk se yumi givgivhan gud long yumi nating se yumi gat defdefren bilif.” Wan narafala man i talem se: “Mi sore we mifala i stap luk yufala olsem ol man blong visitim ol man long Sande nomo, mifala i no tingbaot help we yufala i givim.”