Long yia 2012, Buk Blong Ol Baebol Stori i kamaot long lanwis blong ol man Filipin, hemia Pangasinan. Buk ya i givhan long plante pikinini long skul we oli toktok lanwis ya. Mo tu, Dipatmen blong Edukesen long Filipin i wantem se ol tija blong praemeri, oli mas tijim ol pikinini long prapa lanwis blong olgeta.

Long Filipin i gat bitim 100 lanwis, taswe oli no save se weswan lanwis blong yusum long ol klasrum. Long yia 2012, Dipatmen blong Edukesen i faenemaot se “sipos oli yusum lanwis we pikinini i stap yusum long haos,” hemia bambae i mekem se ol pikinini oli “kwik blong lanem mo kasem save samting.” From samting ya, oli stanemap program ya se “Mother Tongue-Based Multi-Lingual Education.” Program ya i blong givhan long ol pikinini long skul blong oli lanem prapa lanwis blong olgeta.

Wan long ol lanwis we oli jusum blong yusum long ol klasrum hemia Pangasinan. Be i gat wan problem. Hedmasta blong wan skul, i talem se i nogat plante buk long lanwis ya we ol studen oli save ridim. Buk Blong Ol Baebol Stori i kamaot long stret taem, hemia long asembli blong tri dei blong ol Witnes blong Jehova long Novemba 2012.

Long asembli ya oli seremaot klosap 10,000 kopi blong buk ya. Ol pikinini mo ol papa mo mama oli glad tumas blong kasem wan buk long lanwis blong olgeta. Wan man mo woman blong hem, tufala i talem se: “Ol pikinini blong mitufala oli laekem buk ya tumas, from se i isi blong oli kasem save long hem.”

Afta long asembli, sam Witnes oli tekem Buk Blong Ol Baebol Stori i go long wan skul long taon ya Dagupan. Ol tija long ples ya, oli glad tumas taem oli luk buk ya long Pangasinan. Ol Witnes oli givimaot bitim 340 buk. Kwiktaem nomo, ol tija oli stat blong yusum ol buk ya blong tijim ol pikinini blong rid long lanwis blong olgeta.

Ol Witnes blong Jehova oli glad tumas se buk ya i givhan long ol pikinini long skul. Wan long ol transleta we i givhan blong transletem Buk Blong Ol Baebol Stori i talem se: “Longtaem finis i kam, mifala i luksave se i impoten blong transletem ol buk long lanwis blong ol man, blong i kasem hat blong olgeta. Taswe ol Witnes oli traehad bigwan blong transletem Baebol mo ol buk we i tokbaot Baebol i go long plante narafala lanwis.”