Long 2 kasem 24 Julae 2016, namba 103 Tour de France, wan bigfala resis blong baskel we ol man long wol oli save long hem, i gohed nating se i gat trabol long Franis. Long 2015, rabis wok blong ol teroris i tekemaot laef blong bitim 100 man long Franis. Biaen bakegen, long wan holide long kantri ya long 14 Julae 2016, wan teroris i draevem trak i go long medel blong wan bigfala hip blong ol man we oli stap wajem ol faea wok long taon ya Nice. I gat 86 man we oli ded mo plante moa oli kasem kil.

Hemia i mekem ol man Franis oli fraet mo oli harem nogud bitim mak, taswe ol Witnes blong Jehova oli wantem tumas blong leftemap tingting mo givim hop long olgeta. Ale oli karem ol troli we i gat ol buk long olgeta, oli go long ol ples we ol man oli hivap blong wajem Tour de France. Bitim 1,400 Witnes oli volontia blong joen long wok ya, mo oli givimaot bitim 2,000 buk we oli tokbaot Baebol, long ol man we oli wantem faenem ansa blong ol impoten kwestin long laef.

Ol man we oli go long ol defdefren taon blong folem resis ya, oli sapraes blong luk ol Witnes blong Jehova long evri ples. Plante taem ol man we oli oganaesem Tour de France oli presem ol Witnes from we oli folem gudfala plan, oli se: “!I luk olsem se yufala i stap long evri ples we ol man blong resis oli go long hem!” Plante man we oli wajem resis ya, oli talem se: “!Ol Witnes blong Jehova oli stap long ples ya tu!” Afta we resis i gohed blong sam dei, !wan bas draeva i talem long kaen fasin se hem i no nidim traket we oli wantem givim long hem, from we hem i kasem fo finis!

Samfala oli luk se ol Witnes oli stap oltaem, ale oli go tekem sam buk long troli. Hemia fastaem we oli ridim ol buk ya. Wan long olgeta, hemia wan man we i wok long wan program blong spot long televisen. Hem i tingbaot we las yia tu hem i bin luk ol Witnes long Tour de France. Long yia ya, hem i go long troli mo i tekem buk ya Spesel Rod Blong Mekem Famle i Hapi, from we hemia wan topik we i impoten long hem. Hem i go sidaon long trak blong hem mo i stat blong ridim buk ya. Biaen hem i tokbaot ol troli long olgeta we oli wok wetem hem, nao olgeta tu oli go tekem sam defdefren buk.

Samfala oli lukaot ol Witnes blong Jehova blong tokbaot ol problem wetem olgeta. Wan yangfala woman i harem se hem i gud blong nating nomo, mo hem i tingbaot blong kilim hem wan i ded long dei ya. Hem i wantem sakem hem long fored blong wan tren, blong tren i ron antap long hem. Be afta we hem i harem se Baebol i tokbaot Kingdom blong God we bambae i putum pis long wol long fiuja, hem i harem gud mo i no moa folem plan ya blong kilim hem wan i ded. Wan narafala woman i talem long ol Witnes se: “!Yufala i gohed long gudfala wok ya!”

Wan woman we i jenis gud, i givhan long wan man we i stap yusum wokingstik. Man ya i talem se hem i fraet long ol strenja, be taem hem i luksave se woman ya i wan Witnes blong Jehova, hem i glad blong letem hem i halpem hem. Hem i talem se: “Tangkiu from naesfala smael blong yu mo ol gudfala klos we yu werem. Yu givim strong tingting long mifala.”