Folem bilif blong ol Witnes blong Jehova, God i luk olgeta man se oli sem mak nomo, nomata se oli kamaot long wanem laen o nesen. (Ol Wok 10:34, 35) Taem mifala i tijim ol man long Baebol, mifala i traem halpem olgeta blong winim filing ya blong agensem narafala from laen o kantri blong hem.

Mo tu, mifala i no sapotem eni grup we i agensem wan laen o nesen. Eksampol: Long taem blong ol Nasi, ol Witnes blong Jehova long Jemani mo ol narafala ples, oli no sapotem kampen blong Hitler agensem sam narafala nesen. Plante handred oli lusum laef blong olgeta from.

Long sem fasin, long 1994, ol Witnes long Ruwanda oli no joen long kampen ya blong kilimaot wan ful laen blong man. Sam Witnes oli putum laef blong olgeta long denja o lusum laef blong olgeta, blong protektem samfala we ol grup oli stap ronem mo kilim olgeta i ded.

Mifala i wantem halpem olgeta man, taswe mifala i wokem mo givimaot ol buk blong tokbaot Baebol long 600 lanwis. Ol kongregesen blong mifala oli welkamem ol man we “oli kamaot long olgeta kantri, mo long olgeta traeb, mo long olgeta grup blong man, mo long olgeta lanwis.”—Revelesen 7:9.