Stat long yia 1999 kasem 2015, ol Witnes blong Jehova oli bildim bitim 5,000 Haos Kingdom long Sentrol Amerika a mo Meksiko. Mo from we i gat wan milian Witnes mo ol narafala man long ol ples ya we oli stap kam long ol miting, oli nidim bitim 700 Haos Kingdom bakegen.

Bifo, ol kongregesen long ol kantri ya oli faenem i had blong bildim ol haos blong mekem wosip long hem. Eksampol, long Meksiko, plante Witnes oli mekem miting long haos blong olgeta nomo. ?From wanem? Hemia from we blong plante yia, loa i talem se ol jos oli no save pem wan graon. Be long ol yia 1990, loa ya i jenis mo ol Witnes blong Jehova oli stat blong bildim plante Haos Kingdom. Nating se i olsem, i tekem plante manis blong bildim wan Haos Kingdom nomo.

Wok ya i spid moa long 1999, taem Grup Blong Bildim Ol Haos Kingdom i stat blong wok folem wan program blong bildim ol Haos Kingdom long ol kantri we oli no gat naf mane. Meksiko mo seven narafala kantri long Sentrol Amerika, oli stap insaed long ol kantri ya. Stat long 2010, branj ofis we i stap long Meksiko i lukaot long wok ya blong bildim ol Haos Kingdom long eria ya.

Olgeta we oli wok blong bildim ol Haos Kingdom ya, oli fesem plante problem taem oli bildim ol haos ya long ol ples we oli longwe. Eksampol, long Panama, oli mas karem ol tul blong wokem haos long bot, blong tri aoa. Mo long Chiapas we i stap long Meksiko, ol grup ya oli mas karem ol tul blong olgeta long wan smol plen, blong go kasem ples we oli mas bildim haos long hem.

Ol man we oli no Witnes blong Jehova tu, oli wantem tumas blong luk ol niufala Haos Kingdom long komuniti blong olgeta. Eksampol, wan man Honduras i talem se bifo we ol Witnes oli bildim Haos Kingdom long ples ya, ol narafala man oli bin askem blong bildim wan naetklab long graon ya. Be hem i no wantem. Taem ol Witnes blong Jehova oli talem se oli plan blong bildim Haos Kingdom long ples ya, hem i talem se: “!Hemia wan bigfala blesing!”

Long plante ples, ol man oli sapraes blong luk we ol man we oli bildim ol haos ya, oli wok had. Wan man Guatemala i talem se: “Long kastom blong mifala, plante taem ol woman oli wok nomo long kijin. Be long ples ya, ol woman oli mekem sem wok olsem ol man. Mi mi sapraes tumas blong luk we ol woman oli fasem ol aean blong simen, mo oli plasta long wol blong haos. !Mi no save bilivim!” Sam man we oli stap raonabaot oli pem sam kakae mo dring blong olgeta we oli wok.

Plante man tu oli glad blong luk stael blong ol Haos Kingdom blong mifala. Long Nikaragua, wan enjinia i talem long mea blong wan taon se Haos Kingdom i wan naesfala bilding, mo ol samting we oli yusum blong wokem haos ya oli beswan. !Mo hem i talem tu se haos ya i gud moa i bitim ol narafala bilding long taon!

I tru, ol Witnes blong Jehova oli glad tumas blong gat wan gudfala ples blong mekem wosip. Oli luksave se afta we oli bildim wan niufala Haos Kingdom, ol Baebol stadi oli glad moa blong kam long ol miting. Ol memba blong wan kongregesen long Meksiko we oli joen blong bildim Haos Kingdom oli glad tumas nao oli talem se: “Mifala i wantem talem tangkiu long Jehova from we mifala i gat janis ya blong bildim wan Haos Kingdom we i leftemap mo i givim ona long nem blong hem.”