Tim we i wok afsaed i yusum sam spesel tul blong putum glu long ol smol pis blong brikis, mo putum i fas long wan aean, blong haedem ol waea insaed long wol blong haos.

Wan akitek i yusum wan spesel tul blong makem ples we bambae oli stanemap ol wol blong haos long hem. Long Haos Blong Slip F (biaen) ol kapenta oli stap wok insaed.

Wan sista i stap sprei long simen wol wetem wota mo i stap smutum mo polisim. Blong no westem wota, Dipatmen we i finisim ol samting i yusum wota we wan masin i tekemaot long win blong miksim simen blong ol wol mo tael.

Aotsaed long Haos Blong Slip E, ol man blong wokem rod oli stap putum kolta long wan rod we i go joen wetem sam narafala rod.

Wan olfala brata we i gat 71 yia, mo we i savegud wok blong putum brikis, i stap mekem wol blong Haos Blong Slip F. Taem wok ya i stat, moa long 100 Witnes we oli gat bitim 70 yia oli kam joen, mo oli yusum save mo gudhan blong olgeta blong givhan long wok ya.

Oli stap long wes saed antap taem oli tekem pija ya. Long evri bilding ya, bambae oli save planem ol samting antap long ruf blong olgeta. Oli putum rel i goraon long ol ruf ya, oli blokem ol hol blong wota i no save gotru, mo oli mekem ol paep blong wota i goaot long hem. Biaen oli sakem ol defdefren sid blong flaoa antap long ol ruf ya. Hemia i mekem i gud long ol pijin, i mekem haos i kolkol, mo i no gat tumas wota i ron taem i gat ren. Long fored blong pija, oli statem fandesen blong Haos Blong Slip A mo wan haos blong ol ofis.

Ol kapenta oli stap putum frem blong doa long wan rum blong slip. Ol frem blong doa ya oli wokem mo pentem olgeta finis mo oli putum ol lok mo hinses tu. Hemia i mekem i isi, mo i kwik blong putum olgeta long ol rum.

Taem san i godaon, ol wokman oli putum ol aean blong fandesen blong ol ofis. Long medel blong pija, yu save luk oli pusum ol aean long ol hol we oli dip, olsem 20 meta mo oli jes fulumap ol hol ya wetem simen. Biaen, yu save luk Haos Blong Slip B.

Wan wokman i stap hangem ol aean long siling blong paking, blong oli save putum ol paep blong hotem ples i stap long olgeta. Oli yusum spesel timba long siling ya blong mekem se ol floa long ol rum antap oli no kolkol tumas.

Wan memba blong tim we i mekem ol laswan wok, hem i stap smutum wol, blong i rere blong putum kapet long hem. Long masin ya, i gat ol smosmol hol we oli pulum das i go insaed, taswe das i no save kamaot.

Tu memba blong tim we oli wokem ol rod, tufala i stap wok afsaed blong mekem rod i go long ples blong karem ol tul. Tufala i yusum wan tul we i wok wetem gas, blong bonem ol nalumlum o gras we oli gru insaed long brikis. Rod ya i givhan blong mekem wota i ronaot, taem i gat bigfala ren.

Tim blong pentem haos i stap pentem wol blong wan kijin wetem wan tul blong pentem haos we oli spre nomo long wol.

Tim we i wok wetem ol bigfala aean i stap karemaot sam long ol aean ya blong mekem rere ples we bambae oli putum ol smol vranda blong wanwan rum. Ol red paep we i stap long medel blong pija ya, oli blong mekem se insaed long ol rum i hot taem we ples i kolkol. Hemia i givhan tu blong mekem ol simen mo wol we oli pentem i drae hareap.

Wan memba blong tim we i mekem ol laswan wok, i stap smutum ol ples long wol blong haos ya we i no smut gud. Kapet ya we oli putum long wol i naes. Oli save wasem, mo tu i save stap longtaem. Biaen, yu save luk ol narafala memba blong tim oli stap pentem wol, mo putum kapet ya.

Bifo oli statem wok, ol wokman oli kam long wan miting blong save wanem wok we bambae oli mekem long dei ya. Brata we i lidim grup i talemaot ol rul blong sefti, mo i rimaendem olgeta bakegen long ol trabol we i save hapen. Ol wokman blong ol defdefren dipatmen oli glad blong wok ovataem blong klinim ol rum insaed long Haos Blong Slip F, mo ol ples raonabaot, bifo man i slip long hem.

Ol wokman oli yusum wan masin we i leftemap olgeta, blong oli wokem ol smol vranda blong ol rum blong Haos Blong Slip F. Kala we oli pentem ol smol vranda ya long hem, i givhan blong luksave bilding ya kwiktaem, mo long taem we ol lif oli folfoldaon long koltaem, kala blong ol vranda mo ol lif ya bambae i mekem ples i luk naes. Long foto biaen, ol wokman oli stap karemaot kaliko we i blokem wota, nao bambae oli karemaot ol aean we ol wokman oli stap klaem long olgeta blong wok antap.

Afta wok, wan brata mo woman blong hem tufala i stap muvum ol samting blong tufala i go long Haos Blong Slip F, we i jes finis nomo. Ol wokman oli save go slip long ol rum ya blong smoltaem. Hemia i sevem mane blong pem rent, transpot, mo tu hemia bambae i givhan long ol wokman blong oli gat moa paoa blong wok.

Long naet, ol wokman oli stap mekem simen long ples blong paking. Biaen long olgeta, yu save luk Haos Blong Slip B.

Wan brata mo waef blong hem i stap katem tael blong putum long ples blong kuk long kijin. Tufala i stap yusum wan spesel elektrik so blong katem tael we i no mekem das i kamaot. Elektrik so ya i givhan blong no mestem taem tufala i katem tael. Tufala i mas meksua se ol tael ya oli fit gud long ples we tufala i wantem putum long hem.