Wan trakta i stap kafsaedem graon i go long wan kameong. Oli digimaot sam graon blong mekem rere ples we bambae oli bildim haos long hem, mo oli go sakem graon ya long wan narafala ples.

Sam long ol memba blong dipatmen we i lukaot long lektrik, oli putum gud ol rop blong laet. Bambae oli yusum haos ya blong smoltaem olsem ofis mo ples blong kakae taem oli stap bildim niufala branj ofis ya, we i stap klosap long ples ya.

Wan foto we oli tekem long plen i soem niufala raonabaot blong go insaed long eria blong branj ofis. Long lefsaed blong raonabaot ya, oli stap rerem wan garen we insaed long hem i gat wan smol pul, mo wan ples we ol man mo ol visita oli save stanap mo lukluk.

Oli hivimap ol hafhaf brikis we oli no yusum, blong mekem ol rod insaed long ples ya.

Long fored, oli stap mekem ol rod, we sam bambae oli yusum blong smoltaem, mo sam bambae i stap olwe. Oli yusum wan pepa we wota i save gotru long hem (white geotextile membrane) blong mekem se fandesen blong ol rod ya i strong. Long raetsaed blong foto biaen, yu save luk wan rola i stap rolem graon bifo we oli putum pepa ya long hem.

Sam volontia oli go long wan miting we i stap long 18 defren ples long Inglan mo Aelan. Komiti blong spesel projek ya i mekem plan blong ol miting ya. I gat bitim 15,000 Witnes we oli kam long ol miting ya, mo plante oli agri blong joen long wok ya.

Olgeta we oli wok afsaed, oli hivimap graon long stamba blong wan smol tri we oli planem. Hemia wan long ol 700 tri we oli planem long ples ya. Smol pul ya i givhan blong holem wota taem i gat bigfala ren o hariken, mo biaen i lego wota ya sloslo.

Klosap wok blong digim graon i finis, taswe wok ya i kam bigwan moa nating se ples i no klia nating. !Ol wokman oli digimaot finis klosap 160,000 kiubik meta blong graon​—hemia i save fulumap bitim 10,000 kameong!

Tim we i wok afsaed i rerem graon blong planem flaoa i goraon long wan garen. Oli planem 11 defren kaen tri mo 16 defren kaen flaoa insaed long garen ya mo raon long eria ya. Ol tri mo ol flaoa ya oli blong kantri ya nomo.

Long lefsaed, wan trakta i drilim hol blong mekem fandesen. Fastaem, oli drilim hol i godaon, biaen, taem oli stap pulumaot dril, long semtaem oli kafsaedem simen i go insaed long hol ya. Afta long hemia, ol wokman oli putum ol bigfala waea i go insaed long hol ya blong mekem se fandesen i strong, olsem we yu luk long medel blong pija. Oli wokem bitim 360 hol olsem blong mekem fandesen blong haos blong slip.

Long wan moning we i kolkol, wan brata i joenem ol paep blong wota i go long ples we ofis we i lukaot long spesel projek ya, bambae i stap long hem.

Wan trakta we i save wok long wota, i stap karemaot ol doti long wan pul long eria ya. Sam long ol pul ya oli nogud mo oli mas wokem gud bakegen. Sipos oli wokem gud bakegen ol graon we i stap raon long ol pul ya, bambae wota i no save kam antap tumas taem i gat bigfala ren, mo i no save wasemaot ol graon ya. Bifo we oli wokem gud bakegen ol pul ya, oli muvum bitim 2,500 fis i go long sam narafala pul.

Wan foto we oli tekem long plen long saed i go long is. Long fored blong pija, oli stat blong wokem fandesen blong tufala ples blong slip. Long raet saet blong pija daon, yu save luk ol waea we oli putum i go insaed long ol hol blong mekem fandesen. Long lefsaed blong pija daon, oli putum simen finis antap long ol waea ya. Long medel, trakta i stap gohed yet blong drilim ol hol blong mekem fandesen.

Wan sista long tim ya we i finisim evri samting, i stap putum glu long frem blong wan doa long ples blong ol visita, bifo we oli pentem. Long ples ya, ol visita oli save luk ol pija, mo klaem i go antap long sam step blong luk wok we i stap gohed.

Oli stap joejoenem bigfala aean blong putum long wan masin we i stap leftemap ol hevi samting. Masin ya i hae olsem 40 meta, mo i save leftemap 16 tan.

Oli katem ol pos blong mekem se oli no longfala tumas. Bambae oli fasem ol waea insaed taem oli kavremap top blong ol pos ya wetem simen.

Olgeta we oli wok wetem lektrik oli hangem wan long tufala saen blong JW.ORG, long stonwol long saed blong rod we i kam insaed long branj ofis.

Wan foto we i soem ol trak oli ron long raonabaot ya afsaed long get we i kam insaed long branj ofis. Long lefsaed antap, i gat tu saen blong JW.ORG blong soemaot ples blong branj ofis. Taem oli wokem garen mo smol pul we i stap long hem, bambae tufala i flasem get blong branj ofis.

Bigfala masin ya we oli yusum blong leftemap ol samting, i kavremap ples we bambae i gat fo haos blong slip long hem, mo aean blong hem i longfala olsem 65 meta. Long fored, ol wokman oli kafsaedem simen blong wokem floa blong wan haos blong slip. Floa ya bambae i kam ples blong paking blong olgeta we oli slip long stori haos ya. Ol waea oli stanap rere blong wokem ol pos mo wol blong haos.