Niufala entrens blong ofis bilding ya i rere blong oli putum simen long ol ples blong wokbaot mo blong oli planem ol tri. Ples blong wokbaot we i stap long lefsaed daon long foto ya, i gat wan samting we i mekem i stap wom, blong mekem se ol man oli no glis taem i gat sno. Long ol bilding ya i gat Ofis Blong Betel, Ofis Blong Branj Komiti, mo Sevis Dipatmen.

Wan brata we i joen long Dipatmen Blong Wok Insaed, i yusum wan masin blong smutum simen bifo we oli putum floa. I gat wan samting we i joen long masin ya blong pulumaot das.

Oli mekemgud bakegen ples ya we ol visita mo bitim 200 Betelaet we oli laef long Haos ya, oli kam insaed. Mo oli putum ol windo blong letem laet i kam insaed, mo wan niufala alam blong faea.

Wan brata i stap putum ol waea blong telefon mo blong ol narafala samting we oli save yusum blong toktok mo sanem mesej, long rum we bambae oli yusum blong mekem Teknikol Trening. Hemia bambae i givhan long ol wokman blong oli gat gudhan long plaming, lektrik, mo ol sefti rul.

Wan man blong lektrik i stap putum ol LED laet long niufala rum ya blong Teknikol Trening.

Wan wokman i stap jekem spes bitwin ol paep we waea blong lektrik i pas long hem. Bilding ya oli wokem bakegen blong putum ol dipatmen blong branj ofis we fastaem oli stap long Brooklyn.

Wan man blong plaming i stap mekem rere ol paep we bambae hot wota i pas long hem.

Wan wokman blong Dipatmen Blong Wok Aotsaed i stanap long wan bigfala masin blong putum wan kaen glu i goraon long ol windo, blong mekem se ren i no save kam insaed. Long bilding ya i gat 298 windo, hemia i mekem se oli no yusum tumas lektrik blong mekem ples i hot o i kolkol.

Oli bildim bakegen wan wol long ples blong paking, we i stap bitwin Ofis Bilding 1 mo Haos Blong Slip E. Oli yusum bakegen ol ston we oli bin yusum blong bildim wol ya fastaem long 1970.

Wan wokman i stap smutum wol blong oli pentem. Long ol bilding ya i gat Dipatmen Blong Akaon, Kompiuta Dipatmen, mo Dipatmen Blong Pem Ol Samting.

Wan man blong wokem lektrik i stap pulum waea i go antap long ruf, blong konektem long wan bigfala waea we laetning i save pas long hem, blong go stret long graon. Hemia i protektem bilding.

Taem wok i stap gohed long Wallkill, oli lukaot gud long ol samting we oli gru long yad, olsem ol tri we oli stap long foto ya. Tang blong wota we i stap long lefsaed, i save holem samwe long 150,000 lita, mo i saplaem wota i go long ol bilding, ol man blong kilim faea, mo ol samting blong spre wota olbaot sipos i gat wan faea.

Wan kapenta i putum samwe long 1,800 pis timba we oli kolem cherry, long wol blong wan bigfala rum blong mekem miting. Ol pis timba ya oli no tik sem mak, hemia i givhan blong mekem se i no gat tumas eko.

Charles Reed i wok long Betel stat long yia 1958. Taem Betel long Brooklyn i bin wokem ol buk blong Yunaeted Stet mo blong plante narafala kantri, Brata Reed i givhan blong disaenem mo putum simen long floa, long ples we ol masin blong printim ol buk oli stap long hem. Long Wallkill, hem i stap long tim we i jekem ol wok blong meksua se i gud.

Ol wokman oli stap tekemaot ol niufala jea long trak, mo tekem i go long bigfala rum blong mekem miting we oli wokem gud bakegen. I gat 812 jea long rum ya.

Taem oli wokem gud bakegen bigfala rum blong mekem miting, oli putum ol skrin mo sam spesel samting long siling blong mekem saon i gud.

Oli putum ofis blong ol nes long bilding ya we oli wokem gud bakegen. Oli mekem ol korido mo ol batrum i kam bigwan moa, blong oli save lukaot gud long ol sikman.

Foto blong ol bilding long Wallkill. Samwe long 2,000 memba blong Betel famle i stap long olgeta. Bighaf blong ol bilding we oli jes wokem o oli wokem gud bakegen i kavremap bitim 102,000 skwea meta. Wok ya i finis long 30 Novemba 2015.