Olgeta we oli mekem plan blong planem ol tri long yad, oli stap tekemaot ol oktri mo ol tri ya maple long wan bigfala trak. Oli planem bitim 1,400 niufala tri long yad blong Warwick.

Evriwan we oli wok long Warwick oli joen wanples blong mekem Kakae Blong Masta. I gat 384 man we oli joen long miting ya. Evri yia ol Witnes blong Jehova raon long wol oli stap mekem miting ya.

Ol kapenta oli stap putum ol windo long haos we i stap long get. Man we i stap long get, bambae i welkamem ol visita, i sekiuriti long ol samting, mo kontrolem ol trak we oli kam insaed mo oli go aotsaed.

Wan papa mo boe blong hem i wok tugeta blong putum ol kapet tael long korido, hemia long nambatu stori. Oli yusum ol kapet tael ya long ol pablik eria, from we i isi moa blong jenisim olgeta we oli nogud i bitim we yu jenisim wan bigfala kapet.

Ol kapenta oli stap putum ol wol blong seraotem ol ofis. Ol wol ya i isi blong tekemaot bakegen, hemia i mekem se oli save jenisim ol spes blong ofis olsem we oli wanem.

Wan wokman i stap rerem smol rum blong ol toelet blong ol visita, rum ya i stap klosap long entrens. Biaen bambae oli putum ol toelet mo ol wol blong seraotem olgeta.

Wan tim i stap mekem wan trening blong kilim faea. Oli mekem olsem blong oli save rere blong kilim wan faea kwiktaem, nao bambae oli naf blong protektem olgeta man mo ol bilding long Warwick, mo tu i mekem se i no wan bigfala baden long ol kampani blong emejensi.

Wan brata blong sevem kakae, i stap arenjem ples we ol brata we oli wok long Warwick oli save sidaon long hem, long men ples blong kakae, bifo we faswan program blong Moning Wosip i stat.

Wan sista we i wan kapenta, i yusum wan mesamen we i gat laet long hem, blong putum bitim 2,500 saen we oli soem daereksen long ol man mo ol visita.

Wan sista i stap weldem ol reil we man i holem taem i wokbaot, hem i stap mekem folem lada we i stat long entrens blong go long wan bigfala rum. Blangket we i stap long pija ya i protektem ol samting raonabaot we oli wokem finis blong hem i no spolem olgeta taem hem i stap wok.

Wan memba blong Wol Mo Siling Dipatmen i stap mekem laswan wok long wol we i lidim man i go long rum ya “Bilif We i Wok,” wan long ol tri men displei we ol visita oli save go luk. Stael we oli jusum i joen wetem taetel blong wanwan long ol galeri ya.

Ol wokman oli stap wokem simen floa. Oli mekem simen ya long wan wei we i strong gud, i no save holemtaet das, mo i no save gat ol mak long wil long hem, mo i isi blong lukaotgud long hem.

Wan grup blong ol kapenta oli stap putum ol faebaglas antap long ruf blong entrens. Faebaglas ya i mekem se laet we i go insaed long men entrens i no strong tumas.

Wan hasban mo waef blong hem i stap putum tael long entrens blong rum ya “Baebol Mo Nem Blong God.” We ol visita oli stap visitim.

Long wan bigfala rum i gat 1,018 jea mo wan kapenta i stap putum wan long ol jea ya. Long ples ya bambae oli mekem Wajtaoa stadi mo ol narafala program long saed blong spirit, we ol famle long Betel oli stap mekem.

Long men entrens, ol kapenta, ol elektrisen, mo ol narafala wokman oli stap putum saen blong welkamem ol visita. Saen ya i gat laet long hem.

Tu sista i givhan blong karem wota blong ol narafala wokman we oli stap wok long men entrens. Oltaem oli mekem ol tim blong konstraksen oli tingbaot se i impoten blong dring wota oltaem, speseli long hot taem.

Wan kapenta i stap wokem ol bokis long rum ya “Baebol Mo Nem Blong God,” ol bokis ya i blong putum Baebol blong ol visita oli luk. Bambae i gat ol foto blong Baebol we yu save muvum i goraon mo ol olfala samting we oli joen wetem Baebol.

Projekta blong bluprint we oli stap long wol i givhan long wan kapenta blong i putum ol pija blong Ostrelia mo ol aelan long Saotis Esia long map we i stap long men entrens. Nem ya Ol Witnes Blong Jehova we i stap long wol, i stap long klosap 700 lanwis.

Ol memba blong Betel famle oli stap long wan miting. Miting ya i blong welkamem mo tokbaot ol samting we ol fiuja Betelaet long Warwick oli mas save mo blong wonem olgeta long ol sefti rul we oli mas folem long sam ples long Warwick.

Oli stap hangem wan raon laet mo ol samting blong hem, antap long ples we man we i toktok long JW Brodkasting i stap toktok long hem. Plante long ol masin ya oli bin tekemaot olgeta long Brooklyn mo tekem i kam.

Wan elektrisen i stap putum wan niu saen wetem laet long hem long men entrens. Long Septemba 1, plante dipatmen blong hedkwota oli stap wok finis long Warwick.