Long ol 28 yia we i pas, bitim 11,000 Witnes blong Jehova oli lego haos mo kantri blong olgeta, blong joen long wok blong konstraksen long 120 kantri. Olgeta ya oli glad blong yusum gudhan we oli gat mo paoa blong olgeta, blong mekem fultaem wok we oli no kasem pei from.

Plante oli pem rod blong olgeta blong go long ol projek ya. Samfala oli yusum spel blong olgeta blong joen long wok ya. Sam narafala oli askem long bos blong olgeta blong givim spel we oli no kasem pei from.

I no gat man i fosem olgeta blong lego ol samting ya, be olgeta nomo oli wantem givhan long wok blong talemaot gud nius blong Kingdom long fulwol. (Matiu 24:14) Oli givhan blong bildim ol ofis, ol rum blong slip, mo ol faktri blong printim ol Baebol mo ol buk we oli eksplenem Baebol. Mo tu, ol Witnes blong Jehova oli bildim ol Haos Asembli we maet oli gat 10,000 jea long olgeta, mo ol Haos Kingdom we oli gat 300 jea.

Wok ya i stap gohed yet. Taem ol wokman oli kasem ples blong bildim haos, branj ofis blong kantri ya i givim ples blong slip long olgeta, kakae, wasem klos blong olgeta, mo i givim sam narafala samting we oli nidim evri dei. Ol Witnes long ples we oli stap bildim haos, olgeta tu oli glad blong joen long konstraksen.

Long 1985, mifala i setemap wan program blong oganaesem wok ya long fulwol mo mekem ol dipatmen oli wok gud tugeta. Ol volontia we oli wantem joen long wok ya, oli mas ol Witnes blong Jehova we oli gat 19 kasem 55 yia, mo oli gat gudhan long saed blong konstraksen. Oli save kasem wan wok we i tekem tu wik o maet tri manis. Sam projek oli longfala moa, olsem wan yia o bitim wan yia.

Ol waef blong olgeta we oli wok long konstraksen, oli kasem trening blong mekem sam wok, olsem fasem ol aean wetem waea, putum ol tael, yusum masin blong smutum ol wud mo pentem. Sam narafala oli givhan blong rerem ol kakae blong ol volontia mo klinim ol rum blong olgeta.

Taem ol volontia oli gobak long ples blong olgeta, samfala oli raetem leta blong talem tangkiu from invetesen we oli kasem blong mekem wok ya. Wan kapol i raetem se: “Mitufala i wantem talem tangkiu tumas long blesing we mitufala i kasem blong wok long branj ofis long Budapes. !Ol Witnes long Hangari oli soemaot bigfala lav mo tangkiu! Afta we mitufala i stap wan manis wetem olgeta, i had blong talem tata. Be oltaem i olsem. Mitufala i wantem traehad blong joen long wok ya bakegen long yia ya. Evritaem we mitufala i joen blong wan manis, mitufala i harem se hemia beswan manis long laef blong mitufala.”