“!Mifala i harem gud tumas from lav we oli soemaot long mifala!” Hemia filing blong wan woman long Yukren we i lesin long wan impoten leta we Stephen Lett i ridim. Brata ya i wan memba blong Hed Kampani blong ol Witnes blong Jehova. Woman ya i wan long ol 165,000 Witnes we oli lesin long tok blong Brata Lett, taem hem i visitim kantri ya long wiken blong namba 10 mo 11 Mei 2014.

Oli tanem tok ya we i stanap long Baebol, i go long faef defren lanwis, mo oli mekem sem mak taem Brata ya i ridim leta ya. Mo i gat samwe long 700 Haos Kingdom olbaot long Yukren we ol man oli save go long hem blong lesin long tok ya.

Long sem wiken ya, Mark Sanderson we hem tu i wan memba blong Hed Kampani, hem i ridim sem leta ya long Rasia. Hemia wan program we oli mekem blong ol brata blong yumi olbaot long Rasia. Oli transletem tok ya i go long 14 lanwis. Mo i gat 180,413 man we oli hivap long bitim 2,500 kongregesen long Belarus mo Russia, blong lesin long tok ya.

Hed Kampani i raetem leta ya i go long olgeta kongregesen long Rasia mo Yukren. Brata Sanderson i ridim leta ya long lanwis Rasia, mo hemia i mekem branj ofis blong Rasia i raetem se: “Taem ol brata mo sista oli luk se Hed Kampani i intres tumas long wok blong prij long ples blong olgeta, samting ya i tajem hat blong olgeta. Mifala evriwan i harem olsem se Hed Kampani i putum han blong hem i goraon long mifala mo i holemtaet mifala.”

Leta ya i blong leftemap tingting mo blong mekem tingting blong ol Witnes i kam strong from we i gat faet long ples blong olgeta. Leta ya i pulum ol brata blong oli gohed blong no joen long wol taem oli stap longwe long politik.—Jon 17:16.

Blong mekem olsem, Hed Kampani i pulum ol Witnes blong oli prea, oli stadi, mo oli tingting dip long Tok blong God, blong mekem se oli save frengud wetem Jehova. Oli harem wan tok we i mekem oli tingbaot bakegen se, nomata wanem trabol we oli save fesem, be oli mas trastem fulwan promes blong God we i stap long Aesea 54:17 we i talem se: “Ol samting ya blong mekem faet bambae oli no save mekem yufala i karekil.”

Long en blong leta ya, Hed Kampani i raetem se: “Mifala i lavem tumas yufala evriwan. Plis yufala i mas save se mifala i stap tingbaot yufala oltaem, mo mifala i stap askem strong long Jehova oltaem blong i givhan long yufala.”

Branj ofis blong ol Witnes blong Jehova long Yukren i tokbaot visit blong ol brata ya i se: “Ol brata oli harem gud tumas from we Hed Kampani i lavem olgeta mo i kea long olgeta. Long sem wiken nomo Brata Lett i stap long Yukren mo Brata Sanderson i stap long Rasia. Samting ya i soemaot se ol man blong God oli joengud, mo i soemaot long ol brata se Jehova mo Jisas i kea long olgeta. Mifala evriwan i luksave se oli kam visitim mifala long stret taem. Mo hemia i mekem tingting blong mifala i strong blong mifala i gohed blong mekem wok blong Jehova, nomata long ol trabol we bambae mifala i fesem.”