I no longtaem i pas, ol Witnes blong Jehova oli mekem ol spesel asembli long Aealan, Brasil, Hong Kong, Isrel, Kosta Rika, Niusilan, mo Swiden. Faswan, hemia long Swiden long Julae 2012, mo tri laswan oli long Kosta Rika mo Niusilan long Jenuware 2013.

Olsem ol narafala bigfala asembli blong tri dei we mifala i mekem evri yia, long ol spesel asembli i gat ol tok long Baebol, wetem sam drama, mo oli aktem sam narafala samting tu.

Ol Witnes oli kasem invetesen blong go long spesel asembli ya long ol narafala kantri. Bifo mo afta long asembli, oli gat janis blong mekem tua blong lukluk sam ples long ol kantri ya.

Wan Witnes we i go long asembli long Brasil, i talem se: “I nambawan tumas blong luk bigfala lav we ol brata oli gat, mo olsem wanem oli welkamem gud mifala. I olsem se wantaem nomo, mi kasem sam niufala famle bakegen.”

Wan narafala Witnes we i go long asembli long Hong Kong, i talem se: “Mi luk olgeta we oli toktok Mandarin oli smael bigwan mo wota i fulap long ae blong olgeta, taem oli holem ol niufala buk long lanwis blong olgeta klosap long jes blong olgeta. Samting ya i tajem hat blong mi bigwan.”

Evri yia, ol Witnes blong Jehova oli mekem ol bigfala asembli raon long wol, mo plante milian man oli kam long ol asembli ya.

Olgeta we oli go long ol asembli ya, oli gat janis blong kasem lav blong ol brata mo sista, mo luk glad mo pis we oli gat. Hemia i kamaot klia moa long ol spesel mo intenasnal asembli. Taem program i finis, ol brata mo sista we oli kam long ol narafala kantri oli storian mo kakae tugeta, givimaot ol smosmol presen mo adres blong olgeta, tekem foto, mo holholem olgeta.

Olsem ol narafala asembli blong mifala, olgeta we oli no Witnes blong Jehova tu oli welkam blong kam.