Long namba 129 miting blong Watch Tower Bible and Tract Society of Pennsylvania we i stap long Sarede 5 Oktoba 2013, i gat 257,294 man long 21 kantri, oli joen long spesel miting ya. Samfala oli stap long taem ya, be sam narafala oli wajem nomo long Intenet. Long nekis wiken blong hem, oli soem spesel miting ya bakegen, mo sam moa Witnes oli wajem. Oli mekem samting ya long 31 kantri, mo i gat 1,413,676 man oli wajem. Namba ya i bigwan moa long namba blong ol man we oli joen long wan spesel miting long Meksiko mo Sentrol Amerika long 28 Eprel 2013, we i gat 1,327,704 man oli joen long hem.

Stat long ol yia 1920, ol Witnes blong Jehova oli yusum telefon mo radio, blong ol man long ol defdefren ples long wol oli save lesin long ol asembli blong olgeta. Be naoia, oli yusum Intenet blong mekem se ol man long ol ples longlongwe oli save harem mo luk ol samting we oli hapen stret long taem blong asembli, no oli save luk afta. Long yia 1942, William we i wan Witnes blong Jehova long Yunaeted Stet, i go long wan asembli long Richmond, Virginia, mo i lesin long ol tok tru long telefon. Be taem hem i skelem taem ya wetem spesel miting we oli holem long yia ya, hem i talem se: “Yu kasem save moa long ol tok, taem yu wajem. Hemia wan samting we i gud tumas.”

Long plante branj ofis blong ol Witnes blong Jehova, sam Witnes oli wok bitim wan yia mo oli spenem plante taosen aoa blong setemap ol samting blong oli save wajem spesel miting ya long Intenet. Long wiken we oli soemaot spesel miting ya, i gat sam teknisen we oli stap wok long wan kontrol rum long Brooklyn, New York, blong jekem program ya. Mo nating se ol man long plante defdefren ples long wol oli wajem spesel miting ya tru long program ya, olgeta long kontrol rum oli stap oltaem blong jekem gud. Ryan we i givhan blong setemap mo jekem program ya, i talem se: “Mifala i no slip nating, be from we mifala i save se spesel miting ya bambae i givhan long plante man, mifala i glad nomo.”