I gat moa long 60 lanwis blong ol abrojinis long Kanada, mo i gat samwe long 213,000 man Kanada oli talem se wan long ol lanwis ya i prapa lanwis blong olgeta.

Blong kasem hat blong ol abrojinis ya, plante Witnes blong Jehova oli lanem wan long ol lanwis ya. Mo long en blong 2015, i gat bitim 250 man we oli finisim kos blong olgeta blong lanem wan lanwis blong abrojinis we ol Witnes oli mekem.

Mo tu, ol Witnes blong Jehova oli transletem ol buk we oli tokbaot Baebol, mo sam sot video i go long eit lanwis blong ol abrojinis blong Kanada. Ol lanwis ya hemia: Algonquin, Blackfoot, Plains Cree, West Swampy Cree, Inuktitut, Mohawk, Odawa, mo Northern Ojibwa. a

Olgeta we oli lanem lanwis blong ol abrojinis, oli talem se hemia i had. Carma i talem se: “Taem mi stat blong givhan long tim we i transletem ol buk i go long lanwis Blackfoot, mi harem olsem se oli fasem ae blong mi nao mi stap wok. Mi no save gud lanwis ya. Mi no save ridim lanwis ya mo mi no haremsave saon blong lanwis ya.”

Terence we i wok wetem tim we i transletem ol buk i go long lanwis West Swampy Cree, i talem se: “Plante wod long lanwis ya oli longfala, mo oli had blong talem.” Daniel, wan fultaem paenia long Manitoulin aelan long Ontario, i talem se: “Mifala i no gat plante samting blong givhan long mifala. Blong lanem lanwis Odawa, mifala i mas faenem wan olfala bubu long komuniti, blong i tijim mifala. Hemia nao beswan rod.”

?Wok we oli mekem i karem frut? Wan woman we i toktok lanwis Ojibwa i talem se samting we ol Witnes blong Jehova oli mekem, i soemaot se oli defren long ol narafala jos. Hem i talem se taem ol Witnes oli go long haos blong ol man mo oli ridim Baebol long lanwis Ojibwa, oli givhan long ol man blong oli no fraet blong tokbaot Baebol.

Wan transleta we nem blong hem Bert, hem i gruap long Alberta, long komuniti ya Blood Tribe. Hem i talem se: “Mi luk ol man we oli toktok lanwis Blackfoot oli holem buk long jes blong olgeta, mo oli talem se, ‘Hemia i lanwis blong mi. !Hemia blong mi!’ Oltaem mi luk we wota blong ae blong olgeta i ron taem oli wajem wan video long lanwis blong olgeta.”

Wan woman we i toktok lanwis Cree, i glad tumas taem i wajem video ya ?From Wanem Yu Mas Stadi Baebol? long prapa lanwis blong hem. Hem i talem se i olsem we mama blong hem i stap toktok long hem.

Plante Witnes oli traehad bigwan blong tokbaot ol tok blong Baebol blong leftemap tingting blong ol abrojinis. Terence mo waef blong hem, Orlean, tufala i tokbaot wan trip we oli mekem. Tufala i talem se: “Mifala i go long plante trak, mo mifala i ron 12 aoa long rod we i gat aes long hem, blong mifala i save prij long ol man we oli stap long wan ples we nem blong hem Little Grand Rapids. !Ol man oli lesingud!”

Sam narafala oli lego gudfala haos blong olgeta, blong oli save go laef klosap long ol ples we ol abrojinis oli stap long hem. Daniel mo waef blong hem, LeeAnn, tufala i prij tri manis long Manitoulin aelan, biaen tufala i mekem desisen blong muv i go stap long ples ya. Daniel i talem se: “Mitufala i glad tumas blong mekem se ol man ya oli trastem mitufala mo mitufala i givhan long ol man we oli intres.”

?From wanem ol Witnes blong Jehova oli traehad blong kasem ol abrojinis ya? Rose, waef blong Bert, i talem se: “Mi tu mi wan abrojinis, mo taem mi luk se ol advaes blong Baebol oli givhan long mi, hemia i pulum mi blong mi givhan long ol narafala tu.”

Orlean i talem se: “Mi wantem tumas se ol man Cree oli gat janis blong God i lidim olgeta. Hemia wan bigfala blesing blong givhan long olgeta, blong oli kam klosap long Jehova mo oli save olsem wanem blong winim ol trabol we oli stap fesem tede.”

Marc i wok wetem team we i transletem ol buk i go long lanwis Blackfoot. ?From wanem hem i traehad blong kasem ol abrojinis long ples blong hem? Hem i talem se: “Hemia from we mi lavem olgeta tumas.”