Long namba 6 kasem 16 Jun 2013, plante man raon long wol oli joen tugeta long wof blong Rouen, long not blong Franis. Nem blong wof ya Armada, mo hem i wan long ol ples long wol we i bigwan mo i naes we i naes.

Ol sip oli mas ron 120 kilometa folem reva blong Seine, mo pas tru long naesfala ples ya Normandy blong go angka insaed long wof. Blong bitim 10 dei, ol visita oli save go fri nomo insaed long ol 45 bigbigfala sip blong faet.

?Wanem i pulum plante man blong go long Armada? Man we i mekem plan blong lafet ya i talem se, Armada “i mekem ol man i drim.” Hemia i tru nomo, plante man, nating se oli olfala no oli yangfala, be taem oli luk ol bigbigfala sip ya hemia i mekem oli tingbaot ol longfala trip mo filing ya blong kam wan fri man.

Plante taosen turis we oli kam, oli gat janis tu blong save wan narafala samting we i mekem man i fri, hemia ol trutok blong Baebol. (Jon 8:31, 32) Taem oli stap wokbaot mo lukluk ol naesfala samting blong bifo, oli no save mestem ol troli blong ol Witnes blong Jehova. Taem ol visita mo ol boskru oli kam klosap long troli, ol Witnes oli talem long olgeta blong tekem eni buk we oli wantem mo i fri nomo. Plante oli intres long magasin ya ‘?Wetaem Bambae i Save Gat Wan Wol We i No Moa Gat Rabis Fasin?’ mo tu oli kasem wan invetesen blong kam lesin long wan tok we i kamaot long Baebol long Franis, Inglis, o Spanis.

Ol man blong ples ya oli glad tumas from wok ya we ol Witnes blong Jehova oli stap mekem. Wan man we i sapraes blong luk ol Witnes long pablik ples, i talem se: “Mi mi glad blong luk yufala long ples ya. Mi mi respektem ol man we oli stanap strong from bilif blong olgeta, nating se mi no gat sem bilif long olgeta.” Tu olfala i mitim sam yangfala Witnes, nao tufala i talem long olgeta se: “!Yufala i mas praod blong stap olsem ol Witnes blong Jehova!”