Long 2014, Hed Kampani blong ol Witnes blong Jehova i mekem wan niufala program blong mekem se mesej blong Baebol i go long ol eria long Not blong Yurop mo Amerika. (Ol Wok 1:8) Hemia ol eria blong Alaska long Amerika, Laplan, Finlan, Nunavut mo ol teritori long Not wes blong Kanada.

Ol Witnes blong Jehova oli bin go prij long ol eria ya plante yia bifo finis. Be oli stap blong sot taem nomo. Ol buk mo ol magasin blong olgeta tu i finis.

Be folem niufala program ya, ol branj ofis blong ol Witnes blong Jehova we oli lukaot long wok blong prij long ol eria long not, oli askem ol fultaem minista (paenia), blong oli go stap long ol ples ya blong tri manis olsem blong prij. Sipos i gat plante man we oli intres blong stadi long Baebol, ol paenia ya oli save stap longtaem moa, mo tu oli save mekem ol miting.

Be long Not, i gat sam samting we ol paenia ya oli fesem. Tu paenia brata we oli sanem tufala i go long taon blong Barrow long Alaska, wan i bin laef long saot Kalifonia, mo narawan i laef long Georgia, long U.S.A. !Long faswan taem we ples i kolkol long Barrow, tempraja i godaon kasem maenas 38 digri selsias (-36°F) !Be, long ol faswan manis nomo, tufala i visitim samwe 95 pesen blong ol haos long taon ya, mo statem fo Baebol stadi. Wan long ol stadi ya i wan yangfala man we nem blong hem Jon. Hem mo gelfren blong hem i stap stadi long buk ya ?Wanem Samting We Baebol i Rili Tijim? Mo hem i tokbaot ol samting we hem i lanem wetem ol fren blong hem mo olgeta we oli wok wetem hem. Hem i stap ridim buk ya tu Ridimgud Ol Tok Blong Baebol Evri Dei we i stap long JW Library long mobaelfon blong hem.

I no gat rod blong trak we i go long Rankin Inlet, wan ples long Kanada long teritori blong Nunavut. Ale tu paenia i flae long plen i go long smol vilej ya. Tufala i statem plante Baebol stadi. Afta we tufala i soem long wan man video ya ?Wanem i Stap Hapen Insaed Long Haos Kingdom?, hem i askem se wetaem bae yufala i bildim wan Haos Kingdom long eria blong mifala. Hem i gohed i se, “sipos mi stap yet we yufala i bildim wan Haos Kingdom long ples ya, bae mi kam long ol miting.”

Oli sanem tu paenia brata i go long Savukoski, Finlan, wan ples we i gat plante dia ya reindeer. Tufala i talem se “tempraja i go daon mo i gat plante sno.” Nating se i olsem, tufala i talem se tufala i go long wan stret taem. ?From wanem? Tufala i se, “mitufala i naf blong finisimgud ol teritori,” from we “ol man oli tekemaot sno long ol rod we i go long ol vilej mo ol narafala ples we i stap longwe. Mo tu, from we ples i kolkol ol man oli stap nomo long haos.”

Wok we mifala i mekem blong talemaot trutok blong Baebol long ol ples long not i gat paoa long ol man. Afta we tu paenia brata i visitim wan mea blong wan taon blong Alaska, hem i postem wan gudfala mesej long Intenet blong tokbaot samting we tufala brata ya i tokbaot wetem hem, mo i putum pija blong traket ya ?Kingdom Blong God Hem i Wanem?

Long Haines Alaska, tu paenia brata i stap mekem miting long pablik laebri, mo samwe eit man i stap kam long ol miting ya. Nius pepa blong ples ya i talem se i gat tu man we i stap long taon ya we tufala i kam long Tekses mo Carolina. Tufala i stap go long haos blong ol man mo tijim olgeta long Baebol. Long en blong toktok blong olgeta oli se: “Yufala i go long jw.org blong lanem moa.”