Long Solwota blong Not, klosap long weskos blong Jemani, i gat wan eria we nem blong hem Schleswig-Holstein. Long ples ya, i gat plante smosmol aelan we oli kolem Haligen, mo samwe long 300 man oli stap long ol smosmol aelan ya. ?Be olsem wanem ol Witnes blong Jehova oli talemaot tok blong Baebol long ol man ya?—Matiu 24:14.

Ol Witnes oli go long bot blong kasem sam long ol smol aelan ya. Be blong go long sam narafala aelan ya, wan smol grup blong ol Witnes oli yusum wan defren rod. Oli wokbaot samwe long faef kilometa i gokros long rif blong solwota. ?Oli mekem samting ya olsem wanem?

Blong mekem olsem, oli wajem gud solwota. Solwota raonabaot long ol smosmol aelan blong Haligen, i kamso no i drae long evri sikis aoa olsem. !Taem solwota i drae, hem i drae gogo kasem tri meta olsem, mo taem i kamso, hem kam antap blong tri meta! Ale, taem solwota i drae, botom blong solwota i stap long drae ples nomo, nao ol Witnes oli save wokbaot krosem blong kasem tri long ol smosmol aelan ya.

?Wokbaot ya i olsem wanem? Ulrich we i lidim grup ya, i talem se: “I tekem klosap 2 aoa blong kasem wan long ol smosmol aelan ya. Plante taem, mifala i wokbaot drae leg nomo, hemia i moa gud mo i moa isi blong krosem rif blong solwota. Be long taem blong kolkol, mifala i werem ol but.”

Taem yu wokbaot long drae solwota, yu luk sam samting we i defren olgeta. Ulrich i talem se: “Maet yu harem olsem se yu stap wokbaot long wan narafala planet. Sam ples i gat sofmad, sam narafala ples i gat ol ston we oli raf, mo sam narafala ples bakegen i gat ol gras blong solwota. Yu save luk plante pijin blong solwota, ol krab, mo ol narafala anamol bakegen.” Samtaem, long medel blong ol sofmad, oli mas krosem sam krik tu we oli singaot long lanwis Jemani se Priele.

I no isi blong oli wokbaot long rif blong solwota. Ulrich i givim woning long olgeta se: “Yufala i save lus isi nomo, speseli taem i gat smok blong solwota. Taswe, yumi mas yusum kampas mo GPS, mo yumi respektem gud taem we yumi mas folem, blong yumi kambak bifo we solwota i kamso.”

?Traehad blong olgeta i karem gudfala frut? Ulrich i tokbaot stori blong wan olfala man we i gat bitim 90 yia, we i stap ridim Wajtaoa mo Wekap! oltaem. Hem i talem se: “Wan dei, taem blong mifala i sot, nao mifala i no save visitim olfala ya. Be bifo we mifala i aot, olfala ya i ron long baskel i kam, mo i askem se: ‘?Bambae yufala i no givim Wajtaoa blong mi?’ Mifala i glad tumas blong givim long hem.”