Long plante taon raon long wol, ol man oli lan blong luk ol troli blong ol Witnes Blong Jehova. Oli yusum ol troli ya blong soemaot ol buk we i tokbaot Baebol. Long Jemani, yu save faenem ol troli ya long Berlin, Cologne, Hamburg, Munich, mo long ol narafala bigfala taon.

?Be olsem wanem? ?Ol troli ya bambae oli wok gud long ol smosmol taon long Jemani we ol man oli stap go spel long olgeta? ?Olsem wanem long ol taon long not we i gat ol bigfala hotel, ol ples klosap long solwota, mo ol aelan blong Baltic Si mo Not Si? Blong faenemaot, branj ofis blong ol Witnes Blong Jehova long Sentrol Yurop i mekem wan spesel plan long 2016. Long Mei kasem Oktoba, samwe long 800 Witnes we oli yusum troli blong prij long ol bigfala taon, oli volontia blong go prij wetem troli long klosap 60 ples long not blong Jemani. Sam long olgeta oli kam long ol ples longwe, olsem Vienna, long Ostria.

Ol man oli welkamem gud ol Witnes. Wan volontia i talem se: “Ol man oli intres, oli frengud, oli wantem save moa, mo oli glad blong storian.” Heidi, we i go long taon blong Plon, i talem se: “Afta we sam dei i pas, ol man oli luk mifala olsem ol manples. Samfala we oli luksave mifala oli tata long mifala.” Wan man we sora blong hem i fas i mekem saen se: “!Yufala i stap long evri ples!” Hem mo ol fren blong hem, oli stap kambak long wan lafet blong ol man we sora i fas, hemia long saot is Jemani, mo long ples ya tu hem i bin mitim ol Witnes Blong Jehova.

Sam man oli givhan long mifala tu. Long aelan blong Wangerooge, wan polis i kam luk ol Witnes mo i talem long kaen fasin olsem wanem oli save kasem moa man. Long taon blong Waren an der Muritz, kapten blong bot we i karem ol turis, i stap soemaot sam ples long haba. Hem i poen i go long ol troli mo i talem se: “Yufala i save go longwe blong lanem samting long saed blong God.” Sam long ol man ya oli kam klosap long ol troli mo oli tekem taem blong ridim ol posta we i stap.

Ol turis mo ol manples oli intres long trifala buklet ya:

• ?God i Rili Kea Long Yumi? Wan turis i talem se: “Longtaem finis, mi stap tingbaot kwestin ya. Naoia we mi spel, bae mi gat taem blong ridim buk ya mo faenemaot ansa.”

• !Gud Nius We i Kamaot Long God! Wan olfala man i talem long ol Witnes se hem i no glad long ol jos. Ol Witnes oli halpem hem blong kasemsave se i no gat wan man we i save stretem ol problem blong yumi, God nomo i save mekem. Man ya i glad tumas blong tekem buklet ya mo i promes blong ridim.

• Baebol Lesen Blong Mi. Wan papa i letem smol gel blong hem i karem buklet ya we i blong ol pikinini. Mo tu, hem i tekem Buk Blong Ol Baebol Stori mo hem i talem se: “Buk ya bae i gud long famle blong mi.”

Ol man we oli stap pas oli tekem bitim 3,600 buk. Sam man oli askem long ol Witnes blong oli visitim olgeta long haos blong storian moa.

Ol Witnes we oli joen long wok ya oli laekem tumas. Jorg mo waef blong hem Marina, we tufala i go long wan ples klosap long Baltic Si, tufala i se. “Hemia i wan spesel presen. Mitufala i haremgud long ol samting we God i wokem, mo long sem taem, mitufala i save tokbaot hem wetem ol narafala.” Lukas, we i gat 17 yia, i talem se: “!Mi laekem tumas wok ya! Mi gat gud taem, mo long sem taem mi givim wan impoten samting long ol narafala.”