Ol man oli savegud ol Witnes blong Jehova from wok we oli mekem blong transletem ol buk i go long ol narafala lanwis. Long Novemba 2014, oli makem se oli bin transletem Baebol i go long 125 lanwis, mo oli transletem ol buk we oli tokbaot Baebol long 742 lanwis. Be i no ol buk nomo, oli transletem ol video tu. Long Jenuware 2015, video ya ?Wanem i Stap Hapen Insaed Long Haos Kingdom? i stap long 398 lanwis, mo video ya ?From Wanem Yu Mas Stadi Baebol? i stap long 569 lanwis. ?From wanem oli mekem wok ya? ?Mo oli mekem olsem wanem?

Long Maj 2014, Hed Kampani blong ol Witnes blong Jehova i askem long ol branj ofis blong hem long fulwol, blong oli transletem ol video i go long ol defdefren lanwis, blong pulum ol man blong oli stadi Baebol.

Blong transletem wan video i go long nara lanwis, oli folem ol rod ya: Fastaem, ol transleta oli transletem ol tok blong video ya. Biaen oli jusum ol defdefren man we oli toktok lanwis ya blong mekem ol defdefren voes long video ya. Afta oli rikodem olgeta ya wanwan, mo oli jekemgud ol voes ya bakegen mo oli putum long stret ples blong olgeta. Sipos i gat ol raeting we oli kamaot long skrin, oli putum olgeta tu i go long stret ples blong olgeta. Mo laswan samting we oli mekem, oli putum ol toktok, saon, mo raeting we i kamaot long skrin i go wanples blong mekem wan video, mo oli putum i go long websaet.

Sam branj ofis oli gat ol rum blong mekem rikoding mo oli trenem samfala blong lukaot long wok ya. ?Be olsem wanem long ol lanwis we oli stap longwe long taon?

Long fulwol, ol man we oli mekem wok blong rikoding, oli yusum wan smol masin blong rikodem ol toktok. Oli yusum wan maekrofon mo wan laptop we i gat program blong rikoding, nao oli save mekem rikoding long wan ofis, Haos Kingdom o haos blong wan Witnes. Ol man we oli toktok lanwis ya nao, oli ridim ol tok, oli lukaot long wok ya mo oli jekem ol rikoding. Taem ol rikoding ya oli finis mo oli luk se i stret, man we i mekem rikoding i karem ol ting blong hem mo i go long narafala ples bakegen.

Niufala rod ya i mekem se namba blong ol lanwis we ol video i stap long olgeta i 3 taem antap long namba blong ol lanwis we i stap finis.

Samting we i kamaot from ol video ya i nambawan tumas. Plante man oli talem se ol video blong yumi oli faswan video we oli wajem long prapa lanwis blong olgeta.

Wan long ol lanwis we oli rikodem hemia Pitjantjatjara(Pi-jan-ja-ja-ra) we bitim 2,500 man Ostrelia oli stap toktok long hem. Oli rikodem lanwis ya long Alice Springs, wan taon long Not blong Ostrelia. Callan Thomas wan man we i givhan blong mekem rikoding, i talem se “ol man oli glad tumas long ol video ya. Oli laekem tumas blong wajem ol video ya mo oli wantem save ples we oli save faenem sam moa video olsem. I no gat plante magasin long lanwis ya. From samting ya taem oli harem mo oli luk ol video ya oli glad tumas mo tinghae long hem.”

Long Cameroon, tu Witnes i padel long kenu folem reva i go antap kasem wan vilej we oli kolem Pygmy. Nao tufala i stori wetem jif blong vilej ya we i wan tija long ples ya. Mo tufala i faenemaot se hem i toktok lanwis ya Basa. Ale tufala brata ya tufala i soem video ya ?From Wanem Yu Mas Stadi Baebol? long lanwis blong hem. Jif ya i glad tumas mo hem i wantem karem sam magasin blong yumi.

Long wan vilej long Indonesia, wan lida blong jos i agensem ol Witnes blong Jehova mo hem i bonem olgeta magasin we oli stap seremaot long ples ya. Sam narafala oli stap talem se bambae oli bonem Haos Kingdom. Biaen, fo polis man oli go long haos blong wan Witnes mo oli askem kwestin long hem mo famle blong hem. Oli wantem save wanem i stap hapen long Haos Kingdom. Ale hem i soem video ya ?Wanem i Stap Hapen Insaed Long Haos Kingdom? long lanwis blong Indonesia.

Taem oli wajem video ya finis, wan long ol polis ya i talem se: “Naoia mi luksave se ol man oli gat rong tingting long saed blong yufala mo oli no rili save yufala.” Wan narafala polis i askem se: “?Mi save gat video ya blong soem long ol narafala? Video ya i givim stret save we ol man oli mas save long saed blong yufala.” Naoia, ol polis ya oli gat stret tingting long ol Witnes mo oli protektem olgeta.

Sipos yu no wajem ol video ya yet, i gud yu wajem olgeta long prapa lanwis blong yu.