Jenuware 2013 i makem 40 yia we ol Witnes blong Jehova oli printim Wajtaoa long lanwis blong Grinlan. Hemia lanwis blong ol Eskimo mo ol man we oli laef long ol aelan klosap long Alaska. I gat 57,000 man nomo we oli toktok lanwis ya.

I gat samwe long 150 Witnes blong Jehova long Grinlan, be long evri Wajtaoa we i kamaot long lanwis blong Grinlan, oli givimaot 2,300. Hemia i min se bighaf blong ol man we oli ridim Napasuliaq Alapernaarsuiffik (nem blong Wajtaoa long lanwis blong Grinlan) oli no Witnes blong Jehova.

Long televisen, oli askem sam kwestin long brata we i lukaot long translesen ofis long taon blong Nuuk. Hem i eksplenem se: “Plante man long Grinlan oli intres long Baebol, hemia nao risen from wanem oli laekem Napasuliaq Alapernaarsuiffik.”

Taem oli askem long wan woman Grinlan we hem i wan transleta, from wanem hem i laekem magasin ya, hem i talem se: “Magasin ya i givhan bigwan long mi. Hem i soemaot long mi olsem wanem blong gat wan gudfala helti laef. Bifo, mi mi smok bitim mak, nating we mi save se i no helti. Be Baebol i talem se sipos mi wantem helti, mi mas gat wan klin bodi.”

Mo tu, long televisen oli talem se ol Witnes blong Jehova oli statem wok blong olgeta long Grinlan raonabaot long 1955, mo oli printim ol buk mo buklet long lanwis blong Grinlan. Ol volontia we oli kam long Denmak mo Grinlan, oli transletem ol buk ya, mo oltaem oli traehad blong yusum ol tok we i stret long lanwis blong Grinlan mo i olsem storian nomo.

Wan man Grinlan, we i wan Witnes longtaem finis, i talem se: “Mi prij 25 yia finis long ol man Grinlan, mo mi luk olsem wanem ol buk blong mifala long lanwis blong olgeta i halpem olgeta. Long sam ples we mifala i save go sam manis nomo evri yia long bot, i gat ol man we oli laekem tumas ol magasin blong mifala. Taswe, long ol manis we mifala i no save go, mifala i raetem leta long olgeta mo sanem ol magasin.”

Stat long Jenuware 2013, Wajtaoa blong stadi mo Wajtaoa blong givimaot long ol man, i kamaot long lanwis blong Grinlan. Yu save ridim mo daonlodem ol magasin ya long jw.org, sipos yu go long “Publications,” yu jusum lanwis ya Greenlandic, mo yu klik long “Lukaotem.”