I no isi blong transletem wan singsing i go long narafala lanwis. Be i moa had blong transletem wan singbuk we i gat 135 singsing long hem.

Long tri yia nomo, ol Witnes blong Jehova oli winim samting ya taem oli transletem niufala singbuk blong olgeta, Singsing Long Jehova Wetem Glad, i go long 116 lanwis. Mo tu, i gat 55 singsing blong buk ya we oli transletem i go long 55 narafala lanwis. Mo oli stap wok long plante narafala lanwis bakegen.

Ol Witnes blong Jehova oli stap transletem finis ol buk blong eksplenem Baebol oli go long 600 lanwis, we 400 long olgeta oli stap long intenet tu. Be translesen blong singbuk i had moa. ?From wanem? From we tiun blong ol singsing long buk ya Singsing Long Jehova Wetem Glad, i stap sem mak, be ol toktok i jenis i go long plante defren lanwis.

Taem oli jusum ol wod blong wan singsing, hemia i no sem mak olsem we oli transletem wan magasin. Taem oli transletem Wajtaoa, oli traehad blong givim ful mining blong haf we i stap long Inglis. Be long saed blong miusik, i defren.

Teknik we oli yusum blong transletem ol singsing i defren, from we mining i mas klia, ol toktok i naes, mo i isi blong ol man oli tingbaot.

Ol wod we oli yusum long wan singsing blong presem Jehova, oli mas simpol nomo, olsem nao, man we i singim i kasem kwiktaem mining blong hem. Long evri lanwis, ol toktok i mas joengud wetem miusik blong i saon naes, olsem we i prapa tok blong man we i singim.

?Olsem wanem ol transleta oli mekem samting ya? Ol tim we oli transletem singbuk ya Singsing Long Jehova Wetem Glad, oli kasem advaes blong no transletem ol wanwan Inglis wod, be blong yusum ol tok we i givim stret tingting mo filing olsem we i stap long Inglis. Oli traehad blong holemtaet tingting blong Baebol we i stap long ol singsing ya, be oli yusum ol tok we i isi blong man i kasemsave mo tingbaot.

Fastaem, oli transletem ol wanwan Inglis tok long singsing. Afta, wan Witnes we i gat gudhan blong raetem ol singsing, i tanem ol toktok blong i kam moa naes long narafala lanwis, be i holemtaet mining. Biaen, ol transleta mo pruf rida oli jekem ol wok ya, blong meksua se oli holemtaet tingting we i stap long Baebol.

Ol Witnes blong Jehova long fulwol oli glad tumas blong kasem niufala singbuk ya, mo long fiuja bambae i kamaot long plante moa lanwis tu.