Evri yia ol Witnes Blong Jehova oli stap wokem ol video blong soem long taem blong ol asembli blong olgeta. Plante long ol video ya oli stap long Inglis fastaem. ?Be olsem wanem ol man we oli toktok defren lanwis oli kasem save long olgeta? Plante taem, oli transletem olgeta long ol defdefren lanwis mo oli rikodem. ?Ol video ya oli mekem wanem long olgeta we oli kam long ol asembli?

Traem luk samting we sam man we oli no Witnes, oli talem taem oli kam long ol asembli long Meksiko mo long Sentrol Amerika:

• “Mi kasem save long ol video ya, mo mi harem olsem we mi tu mi stap insaed long video. Oli kasem hat blong mi.”—Wan man we i kam long asembli long Veracruz (Meksiko) long lanwis blong Popoluka.

• “Mi harem olsem se mi stap long ples blong mi, mo mi stap toktok wetem wan gudfala fren. Ol video ya oli gud moa i bitim ol muvi, from we mi kasem save evri samting.”—Wan man we i kam long asembli long Nuevo León (Meksiko) long lanwis blong Nahuatl.

• “Taem mi luk ol video long lanwis blong mi, mi harem olsem se oli stap toktok stret long mi.”—Wan man we i kam long asembli long Tabasco (Meksiko) long lanwis blong Chol.

• “Ogenaesesen ya i halpem ol man blong oli lanem trutok long prapa lanwis blong olgeta. !I no gat wan narafala ogenaesesen we i olsem!”—Wan man we i kam long asembli long Sololá (Guatemala) long lanwis blong Cakchikel.

Ol Witnes blong Jehova oli no pem ol man we oli savegud wok blong rikoding, o ol man we oli stap aktem ol muvi. Mo plante taem oli rikodem video long ples we i stap longwe long taon mo i no gat tumas samting. Taswe ?olsem wanem oli save mekem ol gudfala video olsem?

Long ol yia we oli jes pas, branj ofis blong ol Witnes blong Jehova long Sentrol Amerika i lukaot long ol video blong asembli we oli kamaot long lanwis blong Spen mo long 38 defren lanwis bakegen. I gat samwe long 2,500 volontia we oli givhan long wok ya. Ol man blong rikoding mo ol translesen tim, oli rikodem ol niufala video long branj ofis, ol smol ofis blong translesen, o long sam nara ples we oli yusum blong smoltaem nomo. Oli mekem rikoding long 20 defren ples olsem, Belize, Guatemala, Honduras, Meksiko, mo Panama.

I wan bigfala wok blong wokem wan ples blong mekem rikoding we i blong smoltaem mo i nidim ol man we oli gat gudhan blong mekem wok ya. Oli yusum eni samting we oli gat long ples blong olgeta blong blokem ol noes, olsem blangket mo matres.

Plante long olgeta we oli kam blong rikodem ol voes blong olgeta, oli traehad bigwan blong kam long ol ples blong rikoding, nating se oli no gat mane. !Samfala oli mekem wan trip blong 14 aoa! I gat wan papa mo boe blong hem we tufala i wokbaot klosap eit aoa blong kasem ples blong rikoding.

Taem Nomi i smol, hem i stap givhan long famle blong hem blong wokem ol ples blong mekem rikoding. Hem i tingting bak, nao i se: “Mifala i glad taem wik we bambae oli mekem rikoding i kam klosap. Papa blong mi i wokhad blong mekem se evri samting i ron gud. Mo samtaem mama i kuk blong 30 volontia we oli kam.” Naoia Nomi i wok olsem volontia long wan translesen ofis long Meksiko. Hem i se: “Mi mi glad tumas se mi givim taem blong mi blong halpem ol man blong harem tok blong Baebol long prapa lanwis blong olgeta. Hemia wok we i beswan.”

Evri yia ol Witnes blong Jehova oli mekem ol asembli raon long wol mo eni man i save kam. Yu luk haf ya OL BIGFALA ASEMBLI blong kasem moa save.