Long plante buk blong ol Witnes blong Jehova, i gat ol naesfala pija. Be bifo i no olsem. Long faswan kopi blong Zion’s Watch Tower we oli printim long 1879, i no gat pija. Blong plante yia, i gat ol raeting nomo, mo maet i gat wanwan pija o foto long blak mo waet.

Be naoia plante buk blong mifala i fulap long pija. Plante pija mo foto we yu luk long ol buk mo long websaet ya, ol brata mo sista we oli gat gudhan blong dro mo tekem foto oli mekem. I impoten blong mekem plante risej blong wokem ol pija we oli tijim ol man long ol bigfala samting we i hapen long histri, mo ol trutok blong Baebol.

Traem tingbaot pija long atikol ya, we i kamaot long japta 19 blong buk ya “Bearing Thorough Witness” About God’s Kingdom. Ples ya, hemia taon blong Korin bifo. Ol Wok japta 18 i talem se aposol Pol i stanap long fored blong bema, o jea blong jajmen. Ol man blong mekem risej oli lukaot save long saed blong ol olfala samting we ol man oli digimaot long graon, nao oli pasem i go long ol man blong dro. From samting ya, oli kasem save stret ples we ol samting i mas stap long pija blong Pol long fored blong Gallio, mo stret kala blong ol samting we oli wokem long mabel. Oli mekem risej tu long klos blong ol man Rom long ol yia 1 K.T. kasem 100 K.T. Taswe hed gavman ya Gallio we i stap long medel blong pija, i werem klos blong ol haeman blong Rom. Hem i werem wan longfala sot we i no gat han long hem, wetem wan bigfala kaliko we oli flasem wetem pepol mo oli singaotem se toga. Hem i werem sus we oli kolem calcei. Mo tu, ol man blong mekem risej oli makem se taem Gallio i stanap long bema, hem i fesem notwes. Hemia i givhan long ol man blong dro blong save weples laet i mas strong moa long pija ya.

Mifala i mekem lis blong ol pija mo raetemdaon ol risej we mifala i mekem, blong mifala i save yusum bakegen. Blong plante yia, mifala i putum ol pija blong ol wanwan buk long ol bigfala envlop, evri buk i gat envlop blong hem. Mifala i putum ol foto long ol fael folem topik blong olgeta. Be taem ol fael oli kam bigwan tumas, i had blong faenem wan pija blong yusum bakegen.

Long 1991, mifala i wokem wan kompiuta program we i stret long spesel nid blong mifala, nem blong hem Image Services System. Mo naoia i gat bitim 440,000 pija long hem. Be i no ol pija nomo we oli kamaot long ol buk blong mifala we oli stap long ol fael ya, i gat plante taosen foto tu we mifala i save yusum long ol buk long fiuja.

Mo tu, mifala i raetemdaon plante narafala samting, olsem wetaem mo weples oli tekem ol wanwan pija, nem blong olgeta we oli stap insaed long pija, mo wanem taem long histri we pija i soemaot. Taem mifala i stap rerem ol niufala buk, i gud se mifala i save faenem ol stret pija kwiktaem blong yusum.

Samtaem mifala i mas kasem laesens blong yusum pija blong narafala kampani. Maet mifala i nidim wan pija blong ol ring we oli raonem planet ya Saturn blong yusum long Wekap! Taem olgeta we oli mekem risej oli faenem wan stret pija, oli kontaktem ona blong pija ya, blong askem sipos mifala i save yusum. Samfala oli letem mifala i yusum fri, from we oli glad long wok we mifala i stap mekem long fulwol blong tijim ol man long Baebol. Sam narafala oli askem long mifala blong pem o blong raetem long atikol se pija i kamaot long olgeta. Taem oli agri, mifala i yusum pija ya long buk blong mifala, mo kipim long kompiuta wetem ol narafala pija.

Sam buk blong mifala tede, bighaf blong olgeta oli pija nomo. Tingbaot haf long websaet ya, Ol Pija Blong Ol Baebol Stori, mo ol buk we oli gat ol pija, olsem Lesin Long God, we oli yusum smol toktok nomo blong tijim ol impoten lesen. Ol buk ya mo ol narafala samting long websaet, evriwan oli stanap long Baebol.