Magasin ya Wajtaoa, oli printim moa long hem i bitim eni narafala magasin long wol. Oli printim bitim 42 milian kopi blong evri Wajtaoa we i kamaot. Sekenwan hemia magasin ya Wekap!, we oli printim 41 milian kopi blong evriwan we i kamaot. Tufala magasin ya, ol Witnes blong Jehova nao oli wokem, mo oli seremaot long 236 kantri.

?Olsem wanem long ol narafala buk? Folem The Association of Magazine Media, top magasin blong Yunaeted Stet we ol man oli pem mo we AARP i wokem, i blong olgeta we oli gat bitim 50 yia nomo. Oli printim bitim 22.4 milian kopi blong magasin ya. Long Jemani, oli printim klosap 14 milian kopi blong ADAC Motorwelt, mo long Jaena oli printim 5.4 milian kopi blong Gushi Hui (ol stori).

Long saed blong ol niuspepa, Yomiuri Shimbun blong Japan nao we oli printim moa. Oltaem oli stap printim ten milian kopi.

Mo tu, ol buk we ol Witnes oli wokem, oli nambawan long saed blong translesen. Oli transletem Wajtaoa i go long bitim 190 lanwis, mo Wekap! long bitim 80 lanwis. Reader’s Digest oli printim long 21 lanwis nomo, be oli jenisim save insaed blong hem blong i stret long ol wanwan kantri.

Oli yusum presen mane nomo blong wokem Wajtaoa mo Wekap!, i no gat advetaesmen long tufala, mo ol Witnes oli no askem mane long ol man from ol magasin ya. Hemia i defren long ol narafala magasin we yumi tokbaot finis.

Magasin ya Wajtaoa, hem i eksplenem moa ol tijing blong Baebol, speseli long saed blong Kingdom blong God. Oli stat blong wokem magasin ya long 1879 mo i gohed kam kasem tede. Wekap! i tokbaot eni topik nomo, olsem ol kriesen raonabaot long yumi mo sayens, blong halpem man blong i bilif strong se i gat wan Krieta. Mo tu, magasin ya i tokbaot olsem wanem Baebol i save givhan long laef blong yumi.