Bifo we yu odarem Baebol long lanwis blong ol blaenman, Braille, long ol Witnes blong Jehova, i gud yu meksua se yu gat naf spes blong kipim. !Ful Baebol Long Niu Wol Translesen long Braille we i kamaot long Inglis, Spanis, mo lanwis blong Itali, i gat samwe long 18 kasem 28 volium, mo i save tekem klosap tu meta spes long self!

Ol narafala Baebol oli nidim smol spes nomo, oli no olsem Baebol long Braille we oli mas katem ol leta long spesel pepa, blong blaenman i save filim wetem han blong hem. I gat wan smol masin we ol blaenman oli save yusum tu, blong tekem ol not mo faenem bakegen ol save we oli sevem finis. Long masin ya, i gat ol pin we oli kam antap mo godaon blong mekem ol saen long Braille. Mo tu, man we i blaen i save yusum ol skrin rida blong faenem mo lesin long riding blong ol buk. Skrin rida i jenisim ol wod long buk i kam ol toktok we man i save harem.

Antap long hemia, ol Witnes oli wokem wan program long kompiuta we i save jenisim ol toktok long buk i kam Braille, long plante defren lanwis. Afta we oli putum ol wod blong buk mo ol leta long Braille i go long program ya, hem i save jenisim ol wod i go long Braille. Mo tu, hem i mekem i kam olsem wan buk we i isi blong ol blaenman oli ridim. Program ya i mekem se i posibol blong wokem ol buk, wetem Baebol tu, long ol lanwis we oli gat ol leta long Braille, mo hemia ol lanwis tu we oli no yusum alfabet blong yumi.

Bitim 100 yia finis ol Witnes oli wokem ol buk we oli stanap long Baebol blong givhan long ol blaenman, mo naoia ol buk ya oli stap long 19 lanwis. Ol blaenman we oli intres oli save karem ol buk ya we oli no pem, be plante oli glad nomo blong givim presen mane.

Bifo, taem wan niufala buk i kamaot long asembli blong ol Witnes, oli talemaot se ol man oli save odarem biaen long Braille. Be las yia, branj ofis blong Yunaeted Stet i askem long ol kongregesen blong faenemaot weswan asembli ol blaenman wanwan oli plan blong go long hem, mo wanem rod (spesel pepa, masin blong tekem not, o skrin rida) oli laekem moa blong yusum.

Ale oli sanem niufala buk ya we oli wokem long spesel pepa blong ol blaenman, i go long ol ples we ol blaenman oli go long asembli, blong oli save kasem niufala buk ya long semtaem wetem ol narafala. Wan wik afta long asembli, oli jes sanem ol narafala samting long imel, blong blaenman i save kasem buk ya long ol masin.

Wan Witnes we i blaen i talem se: “I wan nambawan privilej blong kasem wan niufala buk semtaem wetem ol narafala. Ol Sam 37:4 i talem se Jehova bambae i givim samting we hat blong yumi i wantem tumas. !Hemia nao samting we hem i mekem long wiken ya!” Wan narawan i stat blong krae mo i talem se: “Oli stap tingbaot mi. Tangkiu long Jehova we hem i stap kea gud long mifala.”