1 Korin 5:1-13
5 Mi mi kasem nius se wan long yufala i stap mekem doti fasin blong seks.* Hem i stap tekem waef blong papa blong hem. Fasin nogud olsem, ol man blong ol neson tu oli no stap mekem.
2 ?From wanem yufala i stap flas from? I moagud yufala i sem, mo yufala i putumaot man we i mekem rabis fasin ya, blong hem i no moa joen wetem yufala.
3 Naoia mi mi stap longwe long yufala, be tingting blong mi i stap wetem yufala.* Mo mi mi jajem man ya finis, i olsem we mi joen wetem yufala.
4 Taem yufala i kam wanples long nem blong Masta blong yumi Jisas, yufala i save se tingting blong mi mo paoa blong Masta blong yumi Jisas, i stap wetem yufala,
5 taswe yufala i mas putum man olsem long han blong Setan blong tekemaot sin ya.* Olsem nao, gudfala tingting bambae i stap gud long kongregesen taem dei blong Masta i kam.
6 I no stret we yufala i stap leftemap yufala. ?Yufala i no save se smol is nomo i save mekem olgeta flaoa blong bred i solap?
7 Yufala i mas sakem olfala flaoa we i gat is long hem, blong yufala i kam olsem niufala flaoa we i no gat is long hem.* Hemia from we Kraes we i smol sipsip blong yumi blong Pasova, hem i ded finis olsem sakrefaes.
8 Taswe taem yumi stap mekem lafet ya, yumi no mas yusum is we i olfala, mo yumi no mas yusum is blong sin mo rabis fasin, be yumi mas yusum bred ya nomo we i no gat is long hem, hemia ol samting we oli gud mo oli tru.
9 Long leta we mi raetem finis long yufala, mi mi talem se yufala i mas stop blong joen wetem ol man we oli stap mekem enikaen doti fasin blong seks.*
10 Be mi no min se yufala i no mas joen nating long ol man blong wol ya we oli stap mekem enikaen doti fasin blong seks,* no ol man we oli wantem tumas samting, no ol man blong stil, no ol man blong wosipim aedol. Sipos i olsem, hemia i min se yufala i mas aot long wol ya.
11 Be naoia, mi mi raet long yufala blong talem se yufala i mas stop blong joen wetem wan man we i talem se hem i brata blong yumi, be i stap mekem enikaen doti fasin blong seks,* no i stap wantem tumas samting, no i stap wosipim aedol, no i stap tok nogud long narafala, no i stap drong, no i stap stil, mo yufala i no mas kakae wetem hem tu.
12 I no wok blong mi blong jajem ol man afsaed. Yufala i mas jajem ol man we oli stap insaed long kongregesen,
13 mo God bambae i jajem olgeta we oli stap afsaed. Baebol i talem se: “Yufala i mas putumaot rabis man, blong hem i no stap long medel blong yufala.”
Ol futnot
^ Grik: por·neiʹa. Yu luk Diksonari.
^ PT: “be mi stap wetem yufala long spirit.”
^ PT: “spolem bodi ya.”
^ PT: “we i no solap.”
^ Grik: por·neiʹa. Yu luk Diksonari.
^ Grik: por·neiʹa. Yu luk Diksonari.
^ Grik: por·neiʹa. Yu luk Diksonari.
