1 Korin 8:1-13
8 Naoia long saed blong ol kakae we oli givim finis i go long ol aedol: Yumi evriwan yumi gat save. Mo save i mekem man i kam flas, be lav i mekem bilif i kam strong.
2 Man we i ting se hem i save samting finis, be no yet ya, hem i no save samting ya stret olsem we hem i mas save.
3 Be sipos wan man i lavem God, man ya God i save hem.
4 Nao long fasin ya blong kakae ol kakae we oli givim finis i go long ol aedol, yumi save se wan aedol i nating nomo, mo i gat wan tru God nomo.
5 Nating se i gat plante samting long heven no long wol we ol man oli singaot olgeta se god, mo i tru se i gat plante “god” mo plante “masta,”
6 be yumi save se i gat wan God nomo, hemia Papa ya we olgeta samting oli kamaot long hem mo yumi man blong hem. Mo yumi save se i gat wan Masta nomo, hemia Jisas Kraes we God i yusum hem blong mekem olgeta samting mo yumi kasem laef long hem.
7 Be i no evri man oli save samting ya. Samfala we oli stap wosipim ol aedol bifo, oli luk kakae ya olsem wan sakrefaes we i go finis long aedol, nao tingting blong olgeta i kam doti from we tingting we i stap jajem olgeta i no strong.
8 Be kakae i no save tekem yumi i go klosap long God. Sipos yumi no kakae, bambae yumi no lusum wan samting, mo sipos yumi kakae, bambae yumi no kasem wan samting tu.
9 Yufala i fri blong jusum samting we yufala i wantem. Be yufala i mas lukaot gud se samting ya i no mekem olgeta we oli no strong, oli foldaon.
10 Sipos yu we yu gat save, yu stap kakae long tempol blong wan aedol, nao wan man we i no strong i luk yu, maet tingting we i stap jajem hem i pusum hem blong i kakae kakae ya we oli givim finis i go long aedol.
11 Sipos yu mekem olsem, save blong yu i spolemgud man ya we i no strong, hemia brata blong yu we Kraes i ded from hem.
12 Taem yufala i mekem sin ya agensem ol brata blong yufala we tingting blong olgeta i no strong mo yufala i spolem tingting blong olgeta, yufala i stap mekem sin agensem Kraes.
13 Taswe, sipos kakae i mekem brata blong mi i foldaon, bambae mi neva kakae mit bakegen samtaem, from we i nogud mi mekem brata blong mi i foldaon.
