1 Pita 5:1-14
5 Mi mi wan elda olsem yufala, mo mi luk ol samting we oli mekem Kraes i safa, mo mi tu bambae mi kasem haenem ya we bambae i kamaot long klia ples. Taswe, mi mi askem strong long yufala ol elda se:
2 Yufala i mas lukaot gud long ol man we God i putum long han blong yufala, olsem we man blong lukaot long sipsip i lukaot gud long ol sipsip blong hem. Taem yufala i lukaot long kongregesen, yufala i mas glad nomo blong mekem wok ya long fes blong God, be yufala i no mas harem se yufala i fosem yufala blong mekem. Mo yufala i no mas mekem wok ya blong kasem pei, be yufala i mas mekem from we yufala i wantem tumas blong mekem.
3 Yufala i no mas mekem olsem we yufala i bos long ol man ya blong God, be yufala i mas soemaot gudfala eksampol long olgeta.
4 Taem nambawan man blong lukaot long sipsip i kam long klia ples, bambae yufala i kasem praes* we i naes tumas mo i no save kam nogud samtaem.
5 Long sem fasin, yufala ol yangfala man, yufala i mas putum yufala i stap aninit long ol man we oli olfala moa long yufala.* Taem yufala i joen wetem ol narafala blong mekem sam samting, yufala evriwan i mas mekem tingting blong yufala i stap daon, mo fasin ya i mas olsem wan klos we yufala i werem oltaem, from we God i agensem ol man we tingting blong olgeta i antap tumas, be hem i kaen tumas long olgeta we oli mekem tingting blong olgeta i stap daon.
6 Taswe, yufala i mas putum yufala i stap aninit long bigfala paoa blong God,* olsem nao long stret taem, bambae hem i leftemap yufala.
7 Mo long semtaem, yufala i mas lego ol wari blong yufala long hem, from we hem i stap tingbaot yufala.
8 !Tingting blong yufala i mas klia gud oltaem mo yufala i mas rere! Enemi blong yufala, Setan,* i stap goraon long yufala olsem wan laeon we i stap singaot bigwan, i stap lukaot man blong i kakae.
9 Be yufala i mas stanap strong long bilif blong yufala, blong yufala i agensem hem. Yufala i save we olgeta brata blong yufala long fulwol we oli bilif,* olgeta tu oli stap safa sem mak olsem yufala.
10 Bambae yufala i safa blong smoltaem, be biaen God bambae i finisim trening blong yufala. God ya i kaen we i kaen. Hem i singaot yufala ya we i joen long Kraes, blong yufala i kasem haenem blong olwe. Hem bambae i mekem yufala i strong, mo i givim paoa long yufala, i mekem yufala i stanap strong we i no gat wan samting i save muvum yufala.
11 Paoa i blong hem oltaem gogo i no save finis. Amen.
12 Mi mi yusum Silvanas,* wan brata we mi mi luk se hem i holemstrong long God, blong i raetem sotfala leta ya i go long yufala blong leftemap tingting blong yufala. Mo blong talemaot long yufala se God i kaen long ol man, mo hemia i tru. Yufala i mas holemtaet fasin ya blong hem.
13 Woman* ya long Babilon, we God i jusumaot hem olsem yufala, hem i talem halo long yufala. Mo pikinini blong mi, Mak, hem tu i talem halo long yufala.
14 Taem yufala i stap talem halo long yufala, i gud yufala i kis long yufala blong soemaot we yufala i lavlavem yufala.
Prea blong mi se yufala evriwan we i joen long Kraes, yufala i gat pis.
Ol futnot
^ PT: “hat blong king.”
^ NT: “aninit long ol elda.”
^ PT: “long strong han blong God.”
^ PT: “Devel.” Yu luk Diksonari.
^ PT: “bigfala famle blong ol brata.”
^ Narafala nem blong hem, Saelas.
^ “Woman ya” i save minim wan kongregesen.
