1 Tesalonaeka 1:1-10
1 Mi Pol mi stap wetem Silvanas* mo Timoti, mo mi raetem leta ya i go long kongregesen blong Tesalonaeka we i joen wetem Papa God mo Masta Jisas Kraes:
Mifala i prea se God bambae i kaen long yufala mo i givim pis long yufala.
2 Taem mifala i tokbaot yufala long ol prea blong mifala, oltaem mifala i talem tangkiu long God,
3 from we long fes blong God ya we i Papa blong yumi, mifala i neva fogetem wok we yufala i mekem wetem bilif mo lav, mo we yufala i stanap strong long ol hadtaem from we yufala i gat hop long Masta blong yumi Jisas Kraes.
4 Ol brata, God i lavem yufala. Mifala i save se hem i jusum yufala,
5 from we taem yufala i harem gud nius, yufala i no harem toktok blong hem nomo be tabu spirit tu i givhan long yufala. Mifala i bilif strong se samting we mifala i stap talemaot i tru, mo ol tok blong mifala i givhan bigwan long yufala.
6 Mo yufala i folem fasin blong mifala mo blong Masta, from we yufala i akseptem tok ya mo tabu spirit i mekem yufala i glad tumas long hem, nating se yufala i kasem plante trabol.
7 Nao yufala i soemaot gudfala eksampol long ol man blong bilif long Masedonia mo Akaea.
8 Yufala i talemaot tok blong Jehova* long Masedonia mo Akaea, mo long olgeta ples tu. Ol man long olgeta ples oli harem we yufala i bilif long God, taswe mifala i no moa gat samting blong talem.
9 Olgeta ya nomo oli stap tokbaot faswan taem we mifala i mitim yufala, mo olsem wanem yufala i lego ol aedol blong yufala blong folem God ya we i laef mo i tru, mo blong kam slef blong hem,
10 mo olsem wanem yufala i stap wet long Pikinini blong hem long heven, hemia Jisas, we hem i mekem hem i laef bakegen. Pikinini ya nao i sevem yumi long kros blong God we i stap kam.
